త్వరలో సీఎం రేవంత్ రెడ్డి క్యాబినెట్ విస్తరణ?

తెలంగాణలో సీఎం రేవంత్ రెడ్డి మంత్రివర్గ విస్తరణపై చర్చలు మళ్లీ ఊపందుకున్నాయి. ముఖ్యమంత్రి ఢిల్లీ పర్యటనకు వెళ్లిన ప్రతిసారీ ఈ అంశం తెరపైకి వస్తున్న నేపథ్యంలో, తాజాగా సోమవారం సాయంత్రం సీఎం రేవంత్ రెడ్డి, డిప్యూటీ సీఎం భట్టి విక్రమార్క, మంత్రి ఉత్తమ్ కుమార్ రెడ్డి, పీసీసీ అధ్యక్షుడు మహేశ్ కుమార్ గౌడ్‌లు ఢిల్లీకి వెళ్లారు.

ఈ పర్యటనలో వారు ఏఐసీసీ అధ్యక్షుడు మల్లికార్జున ఖర్గే, రాహుల్ గాంధీ, కేసీ వేణుగోపాల్‌లతో భేటీ అయ్యారు. రాష్ట్ర వ్యవహారాల ఇన్‌చార్జ్ మీనాక్షి నటరాజన్ కూడా ఈ సమావేశంలో పాల్గొన్నారు. ముఖ్యంగా మంత్రివర్గ విస్తరణ ప్రధాన అజెండాగా చర్చ జరిగినట్లు విశ్వసనీయ వర్గాల సమాచారం.

ఖాళీగా ఉన్న ఆరు మంత్రి పదవులు

తెలంగాణలో కాంగ్రెస్ ప్రభుత్వం 2023 డిసెంబర్‌లో అధికారంలోకి వచ్చినప్పటి నుంచి ఇప్పటి వరకు 11 మంది మాత్రమే మంత్రులుగా బాధ్యతలు చేపట్టారు. రాష్ట్ర కేబినెట్‌లో మొత్తం 18 మంది మంత్రులకు అవకాశం ఉండగా, ఇంకా 6 పదవులు ఖాళీగా ఉన్నాయి. ముఖ్యంగా, హోం, మునిసిపల్ అడ్మినిస్ట్రేషన్, అర్బన్ డెవలప్‌మెంట్, విద్య, జనరల్ అడ్మినిస్ట్రేషన్ వంటి కీలక శాఖలు సీఎం రేవంత్ రెడ్డి వద్దే ఉన్నాయి.

ఈ ఖాళీలను త్వరలో భర్తీ చేసి, ఆయా శాఖలను కొత్త మంత్రులకు అప్పగించేందుకు సిద్ధమైనట్లు సమాచారం. ప్రస్తుతం నలుగురికి మంత్రి పదవులు ఇవ్వాలని నిర్ణయించగా, తర్వాత మరో ఇద్దరిని కేబినెట్‌లో చేర్చనున్నట్లు తెలుస్తోంది.

మంత్రివర్గంలోకి ఎవరు?

మంత్రి పదవుల రేసులో పలువురు సీనియర్ ఎమ్మెల్యేలు ఉన్నా, ప్రస్తుతం కొంతమంది కీలక పేర్లే ప్రధానంగా వినిపిస్తున్నాయి. ఈ ఎంపికల్లో కుల, సామాజిక, రాజకీయ సమీకరణాలను పరిగణనలోకి తీసుకుంటున్నట్లు సమాచారం.

శ్రీహరి ముదిరాజ్ (మక్తల్ ఎమ్మెల్యే)
- ముదిరాజ్ సామాజిక వర్గానికి మంత్రివర్గంలో ప్రాతినిధ్యం కల్పించేందుకు ఆయన ఎంపిక ఖాయంగా కనిపిస్తోంది.
- పార్లమెంట్ ఎన్నికల ప్రచారంలో సీఎం రేవంత్ రెడ్డి స్వయంగా హామీ ఇచ్చినందున, ఆయనకు మంత్రిపదవి దాదాపుగా ఖాయమైనట్లే.
కోమటిరెడ్డి రాజగోపాల్ రెడ్డి (మునుగోడు ఎమ్మెల్యే)
- అసెంబ్లీ ఎన్నికల ముందు బీజేపీ నుంచి కాంగ్రెస్‌లో చేరిన రాజగోపాల్ రెడ్డికి మంత్రిపదవి హామీతోనే పార్టీలోకి తెచ్చుకున్నట్లు సమాచారం.
- ఇప్పటికే ఆయన సోదరుడు వెంకట్ రెడ్డి మంత్రివర్గంలో ఉన్నా, మరోసారి వారి కుటుంబానికి ప్రాధాన్యం ఇచ్చే అవకాశం ఉంది.
జి. వివేక్ (చెన్నూరు ఎమ్మెల్యే)
- గతంలో బీజేపీలో ఉన్న వివేక్, కాంగ్రెస్ హామీతో పార్టీలో చేరారు.
- ఇప్పుడా హామీని నెరవేర్చడానికి కేబినెట్‌లో ఆయనకు స్థానం కల్పించనున్నట్లు తెలుస్తోంది.
పి. సుదర్శన్ రెడ్డి (బోధన్ ఎమ్మెల్యే)
- ఉమ్మడి నిజామాబాద్ జిల్లాకు ఇప్పటి వరకు మంత్రివర్గంలో ప్రాతినిధ్యం ఇవ్వలేదు.
- ఈ నేపథ్యంలో సుదర్శన్ రెడ్డిని మంత్రి పదవిలోకి తీసుకురావాలని అధిష్ఠానం యోచిస్తున్నట్లు సమాచారం.

మంత్రివర్గ విస్తరణపై పీసీసీ అధ్యక్షుడు హింట్

ఢిల్లీ భేటీ అనంతరం పీసీసీ అధ్యక్షుడు మహేశ్ కుమార్ గౌడ్ మీడియాతో మాట్లాడారు. "మంత్రివర్గ విస్తరణపై చర్చ జరిగింది. త్వరలోనే ఖాళీలను భర్తీ చేస్తాం" అని తెలిపారు.

ఉగాది లేదా అంతకన్నా ముందే మంత్రివర్గ విస్తరణ ఉంటుందని ఆయన సూచించినట్లు తెలుస్తోంది. ఇప్పటివరకు లంబించిన సమాచారం ప్రకారం, నాలుగైదు రోజుల్లో మంత్రివర్గ విస్తరణపై అధికారిక ప్రకటన వచ్చే అవకాశం ఉంది.