కేసీఆర్ : మళ్లీ గేమ్ స్టార్ట్..! స్ట్రాటజీతో పాలిటికల్ మాస్టర్ ప్లాన్..!

తెలంగాణ రాజకీయాల్లో మళ్లీ వేడి పెరుగుతోంది. బీఆర్ఎస్ అధినేత, మాజీ సీఎం కేసీఆర్ మౌనాన్ని వీడి, కొత్త వ్యూహాలతో రంగంలోకి దిగారు. రాజకీయాల్లో ఆయన తీసుకునే ప్రతి నిర్ణయం ఎప్పుడూ ప్రత్యేకమైనదే. ఇప్పుడు మరోసారి తన మార్క్ పాలిటిక్స్‌తో తెలంగాణ రాజకీయాల్లో సునామీ తీసుకురావడానికి సిద్ధమయ్యారు.

ఎంపీ కోటా ఎమ్మెల్సీ ఎన్నికల వెనుక వ్యూహం

తెలంగాణలో ఎమ్మెల్యే కోటా ద్వారా 5 ఎమ్మెల్సీ స్థానాలకు ఎన్నికలు జరుగనున్నాయి. ప్రస్తుతం బీఆర్ఎస్‌కు ఉన్న సంఖ్యాబలం ప్రకారం ఒక్క ఎమ్మెల్సీ సీటు మాత్రమే గెలుచుకునే అవకాశం ఉంది. అయితే కేసీఆర్ రెండో అభ్యర్థిని కూడా పోటీకి దింపాలనే వ్యూహాన్ని సిద్ధం చేస్తున్నారు. ఇది కేవలం గెలుపు కోసమే కాదు, కాంగ్రెస్‌లోకి వెళ్లిన పార్టీ ద్రోహులను ఇరకాటంలో పెట్టేందుకు కూడా ఒక వ్యూహాత్మక నిర్ణయంగా బీఆర్ఎస్ భావిస్తోంది.

ఫిరాయింపు ఎమ్మెల్యేలపై గేమ్ ప్లాన్

గత అసెంబ్లీ ఎన్నికల్లో బీఆర్ఎస్ 39 సీట్లు గెలుచుకుంది. కాని కంటోన్మెంట్ ఉపఎన్నికల్లో ఓటమితో అది 38కి చేరింది. ఈ 38 మంది ఎమ్మెల్యేలలో 10 మంది ఎమ్మెల్యేలు పార్టీని వీడి కాంగ్రెస్‌లో చేరారు. దీంతో ప్రస్తుతం బీఆర్ఎస్ వద్ద 28 మంది ఎమ్మెల్యేలున్నారు. ఎమ్మెల్సీ గెలవాలంటే 21 మంది ఎమ్మెల్యేలు అవసరం. ఒకవేళ ఇద్దరు అభ్యర్థులను గెలిపించుకోవాలంటే 42 ఓట్లు ఉండాలి. అంటే మరో 14 ఓట్లు అవసరం.

కేసీఆర్ వ్యూహం ప్రకారం, పార్టీ మారిన ఎమ్మెల్యేలను టార్గెట్ చేస్తూ వారిని మళ్లీ గులాబీ జెండాకి ఆకర్షించేందుకు ప్రయత్నిస్తున్నారు. ఇప్పటికే బండ్ల కృష్ణమోహన్, గూడెం మహిపాల్ రెడ్డిలాంటి నేతలు తాము బీఆర్ఎస్ వైపే ఉన్నామని సంకేతాలు ఇచ్చారు. మరో 4-5 మంది కూడా మళ్లీ బీఆర్ఎస్ వైపే ఓటు వేయవచ్చని అంచనా.

రేవంత్ రెడ్డికి బిగ్ ఛాలెంజ్

కేసీఆర్ స్ట్రాటజీ విజయవంతమైతే, అది సీఎం రేవంత్ రెడ్డి, కాంగ్రెస్ ప్రభుత్వానికి పెద్ద సవాల్ అవుతుంది. బీఆర్ఎస్ రెండో అభ్యర్థిని నిలబెట్టి విజయం సాధిస్తే, కాంగ్రెస్‌లోకి వెళ్లిన ఎమ్మెల్యేలు భవిష్యత్తులో ఏ నిర్ణయం తీసుకుంటారనే అనుమానం ఉత్పన్నం అవుతుంది. ఫిరాయింపుల చట్టం ప్రకారం, పార్టీ మారిన ఎమ్మెల్యేలకు అనర్హత వేటు వేయించేందుకు కూడా బీఆర్ఎస్ బలమైన ఆధారాలు సేకరిస్తోంది.

తుది ఫలితం ఏదైనా – గెలిచేది పాలిటిక్స్..!

ఈ ఎన్నికల్లో గెలుపోటముల కంటే ముఖ్యమైనది, కేసీఆర్ మళ్లీ తన ఆట మొదలుపెట్టారని స్పష్టమవడం. బీఆర్ఎస్‌కు రెండో ఎమ్మెల్సీ స్థానాన్ని గెలిపించగలిగినా, లేకపోయినా – ఈ ఎత్తుగడ రాష్ట్ర రాజకీయాల్లో హాట్ టాపిక్ గా మారింది. మరి, కేసీఆర్ ప్లాన్ ఎంతవరకు సక్సెస్ అవుతుందో వేచిచూడాలి!