నీట్ ఫలితాల భయంతో ఇద్దరు విద్యార్థుల ఆత్మహత్య

చల్గల్ (జగిత్యాల), ఉట్నూర్ (అదిలాబాద్)

జాతీయస్థాయిలో నిర్వహించబడే నీట్ (NEET) పరీక్ష ఫలితాలపై తీవ్రమైన ఒత్తిడితో ఇద్దరు విద్యార్థులు ఆత్మహత్యకు పాల్పడ్డ విషాద ఘటనలు తెలంగాణలో చోటుచేసుకున్నాయి.

జగిత్యాల జిల్లా చల్గల్ గ్రామానికి చెందిన జంగా పూజ (18) అనే విద్యార్థిని 2023లో నీట్ పరీక్ష రాసింది. కానీ ఆశించిన ర్యాంకు రాకపోవడంతో లాంగ్ టర్మ్ కోచింగ్ తీసుకొని 2025లో మళ్ళీ పరీక్ష రాసింది. ఈసారి కూడా తాను ఆశించిన ఫలితాలు రాకపోవచ్చనే భయంతో తీవ్ర మనోవేదనలోకి వెళ్లిన పూజ, తన ఇంట్లో ఉరి వేసుకొని ప్రాణాలు విడిచింది. కుటుంబ సభ్యులు ఈ ఘటనను గమనించగా ఆమె అప్పటికే మరణించింది.

ఇక అదిలాబాద్ జిల్లా ఉట్నూరు ప్రాంతానికి చెందిన రాయి మనోజ్ కుమార్ అనే విద్యార్థి, తాజాగా జరిగిన నీట్ పరీక్షను తాను సరిగా రాయలేదని అనుమానంతో తీవ్రంగా బాధపడి ఉరి వేసుకొని ఆత్మహత్యకు పాల్పడ్డాడు. ఈ వార్త వినగానే అతని కుటుంబ సభ్యులు కన్నీరుమున్నీరయ్యారు.

ఇలాంటి ఘటనలు విద్యార్థుల్లో పెరిగిన ఒత్తిడి, సమాజం నుంచి వచ్చే ఆశల భారం ఎంత తీవ్రంగా ప్రభావితం చేస్తున్నాయన్నది మరోసారి స్పష్టమవుతోంది.

విద్యార్థులకు సూచన: జీవితంలో ఒక పరీక్ష ఫలితం అన్నది అంతిమమేమీ కాదు. ఓటములనూ గెలుపులాగానే తీసుకుంటూ ముందుకు సాగాలి. అవసరమైతే తక్షణమే కుటుంబసభ్యులు, ఉపాధ్యాయులు లేదా మానసిక నిపుణుల సాయం తీసుకోవాలని నిపుణులు సూచిస్తున్నారు..