ఉత్సాహంగా కొనసాగుతున్న ఉచిత వేసవి క్రికెట్ శిక్షణ శిబిరం

భద్రాద్రి కొత్తగూడెం, తెలంగాణ రాష్ట్ర ప్రభుత్వ సహకారంతో భద్రాద్రి కొత్తగూడెం జిల్లా యువజన మరియు క్రీడల శాఖ (DYSO) ఆధ్వర్యంలో, భద్రాద్రి కొత్తగూడెం డిస్ట్రిక్ట్ క్రికెట్ అసోసియేషన్ (BKDCA) సంయుక్తంగా నిర్వహిస్తున్న ఉచిత వేసవి క్రికెట్ శిక్షణ శిబిరం జిల్లాలో గొప్ప ప్రతిష్టతో కొనసాగుతోంది. ప్రగతి మైదానంలో ఏర్పాటు చేసిన ఈ శిక్షణ శిబిరంలో ఇప్పటివరకు 285 మంది విద్యార్థులు తమ పేర్లు నమోదు చేసుకొని శిక్షణ పొందుతున్నారు. ప్రతి రోజు కొత్తగా అభ్యర్థులు జాయిన్ కావడం ద్వారా ఈ సంఖ్య పెరుగుతూనే ఉంది.

ఈ శిక్షణా శిబిరం రోజూ నాలుగు బ్యాచ్‌లుగా కొనసాగుతోంది. ఉదయం 5:30 నుండి 7:30 గంటల వరకు మొదటి బ్యాచ్, ఉదయం 7:00 నుండి 9:00 వరకు రెండవ బ్యాచ్, సాయంత్రం 5:30 నుండి 7:30 వరకు మూడవ బ్యాచ్, 7:00 నుండి 9:00 వరకు నాలుగవ బ్యాచ్‌లుగా శిక్షణ కార్యక్రమం జరుగుతోంది.

ఈ శిక్షణా శిబిరం, జిల్లా కలెక్టర్ శ్రీ జితేష్ వి పాటిల్ IAS గారి మార్గనిర్దేశంలో, జిల్లా యువజన మరియు క్రీడల శాఖాధికారి శ్రీ పరంధామ రెడ్డి గారి పర్యవేక్షణలో, భద్రాద్రి కొత్తగూడెం క్రికెట్ అసోసియేషన్ అధ్యక్షుడు బుడగం మహేష్ గారు, వైస్ ప్రెసిడెంట్ డాక్టర్ B.S. రావు గారి నేతృత్వంలో విజయవంతంగా నిర్వహించబడుతోంది.

శిబిరానికి ప్రధాన శిక్షకుడిగా పంతంగి సాయి నిరంజన్ వ్యవహరిస్తుండగా, సహాయ శిక్షకులుగా బి. ప్రసాద్, ఏ. శ్రీనివాస్, నరేందర్‌లు శిక్షణా బాధ్యతలు నిర్వహిస్తున్నారు. శిక్షణలో క్రికెట్‌కు సంబంధించిన అన్ని అంశాలపై నిపుణుల దృష్టిలో శిక్షణ అందించబడుతోంది — క్రికెట్ డ్రిల్స్, నెట్ ప్రాక్టీస్, ఫీల్డింగ్, బ్యాటింగ్, బౌలింగ్ నైపుణ్యాలు మొదలైనవన్నీ ఈ శిక్షణలో భాగంగా ఉన్నాయి. అంతేకాక, ప్రతీ వారం చివర్లో ప్రాక్టీస్ మ్యాచ్‌లు నిర్వహించడం ద్వారా విద్యార్థులు ప్రాక్టికల్ అనుభవాన్ని పొందుతున్నారు.

తల్లిదండ్రులు తమ పిల్లల శిక్షణను స్వయంగా వీక్షిస్తూ, నిర్వాహకుల కృషిని అభినందిస్తూ హర్షం వ్యక్తం చేస్తున్నారు. పిల్లలు క్రీడల పట్ల చూపిస్తున్న ఉత్సాహం మరియు అభిరుచి భవిష్యత్తులో క్రికెట్ లో జిల్లాను మరింత ముందుకు తీసుకెళ్లే అవకాశాలను కల్పిస్తుందని నిర్వాహకులు ఆశాభావం వ్యక్తం చేస్తున్నారు.

ఈ శిక్షణా శిబిరం మరిన్ని యువ క్రీడాకారులకు ప్రేరణగా నిలుస్తుందని అధికారులు తెలిపారు.