వేసవి సెలవులు – మంత్రుల నిర్ణయంతో నెలరోజుల విరామం
హైదరాబాద్: తెలంగాణ రాష్ట్ర ప్రభుత్వం అంగన్‌వాడీ కేంద్రాలకు వేసవి సెలవులను ప్రకటించింది. గురువారం (మే 1) నుంచి నెల రోజుల పాటు ఈ సెలవులు అమల్లో ఉంటాయి. గ్రీష్మకాలంలో తీవ్రమైన ఎండలు పడుతున్న నేపథ్యంలో, చిన్నారుల ఆరోగ్యాన్ని దృష్టిలో ఉంచుకొని ఈ నిర్ణయం తీసుకున్నట్లు మహిళా, శిశు సంక్షేమ శాఖ మంత్రి సీతక్క తెలిపారు.
తల్లిదండ్రులు, అంగన్‌వాడీ యూనియన్ల విజ్ఞప్తులను పరిగణనలోకి తీసుకున్న మంత్రి, అధికారులను సెలవులపై చర్యలు తీసుకోవాలని ఆదేశించారు. బుధవారం అమీర్‌పేటలోని వెంగళరావునగర్‌లోని కమిషనరేట్‌ కార్యాలయంలో డైరెక్టర్ కాంతి వెస్లీ అంగన్‌వాడీ యూనియన్‌ ప్రతినిధులతో సమావేశమయ్యారు. అనంతరం అధికారికంగా సెలవులను ప్రకటించారు.
అయితే, ఈ సెలవుల సమయంలో కూడా చిన్నారులకు, గర్భిణులకు, బాలింతలకు పోషకాహారంగా గుడ్లు మరియు ఇతర నిత్యావసర వస్తువులు అందిస్తామని డైరెక్టర్ తెలిపారు. అదేవిధంగా, అంగన్‌వాడీ టీచర్లు ఇంటింటికి వెళ్లి ఆరేళ్ల లోపు పిల్లలను అంగన్‌వాడీ కేంద్రాల్లో చేర్పించేందుకు అవగాహన కార్యక్రమాలు నిర్వహించాలని ఆదేశించారు.
ప్రభుత్వం తీసుకున్న ఈ నిర్ణయానికి యూనియన్లు కృతజ్ఞతలు తెలిపారు.
కాంట్రాక్ట్ రెసిడెన్షియల్ టీచర్లకు శుభవార్త – వేతనాలు, సహాయ నిధులపై కీలక నిర్ణయం
హైదరాబాద్: గిరిజన ఆశ్రమ పాఠశాలల్లో పనిచేస్తున్న కాంట్రాక్ట్ రెసిడెన్షియల్ టీచర్లకు (CRTలు) ప్రభుత్వం ఓ శుభవార్త తెలిపింది. వేసవి సెలవుల సమయంలో (21 రోజులు) వారికి వేతనాలు చెల్లించనున్నట్టు ప్రకటించింది. అంతేకాక, ఉద్యోగులు మరణించిన సందర్భంలో అంత్యక్రియల కోసం రూ. 30,000 ఆర్థిక సహాయం అందించనున్నట్టు నిర్ణయించబడింది.
ఈ మేరకు బుధవారం ట్రైబల్ వెల్ఫేర్ కమిషనర్ శరత్ ఉత్తర్వులు జారీ చేశారు. ఈ నిధులు ఐటీడీఏల ద్వారా చెల్లించనున్నట్టు ఉత్తర్వుల్లో పేర్కొన్నారు. ఈ నిర్ణయంతో రాష్ట్రంలోని దాదాపు 2వేల కాంట్రాక్ట్ టీచర్ల కుటుంబాలు హర్షం వ్యక్తం చేశారు. సీఎం రేవంత్ రెడ్డి, మంత్రి సీతక్క, కమిషనర్ శరత్‌కి ధన్యవాదాలు తెలిపారు.
అలాగే, పదో తరగతి ఫలితాల్లో ప్రభుత్వ అంధుల మరియు బధిరుల ఆశ్రమ పాఠశాలలు 100 శాతం ఉత్తీర్ణత సాధించడం పట్ల మంత్రి సీతక్క అభినందనలు తెలిపారు. విద్యార్థులు ప్రభుత్వ ప్రోత్సాహంతో, తమ వైకల్యాన్ని దాటుకొని విజయాన్ని సాధించారన్నది స్ఫూర్తిదాయకమని చెప్పారు.
Post a Comment