ఓకే కుటుంబానికి చెందిన ఇద్దరు మైనర్ బాలికలు ఇంట్లో ఉరివేసుకుని ఆత్మహత్య

హైదరాబాద్‌ నగరంలోని బాలాపూర్ పోలీస్ స్టేషన్ పరిధిలో శనివారం విషాదకర ఘటన చోటు చేసుకుంది. ఓకే కుటుంబానికి చెందిన ఇద్దరు మైనర్ బాలికలు ఇంట్లో ఉరివేసుకుని ఆత్మహత్యకు పాల్పడ్డారు.

నెల్లూరు జిల్లా ఉదయగిరి మండలానికి చెందిన ఈ కుటుంబం జీవనోపాధి కోసం నెలరోజుల క్రితం హైదరాబాద్‌ నగరానికి వలస వచ్చింది. బాలికలిద్దరూ — అక్క వినీల (17) మరియు చెల్లెలు అఖిల (16) — కుటుంబంతో కలిసి బాలాపూర్‌ ప్రాంతంలో నివాసం ఉంటున్నారు.

వివరాల్లోకి వెళితే, పెద్దమ్మాయి వినీల మూడు నెలల క్రితం ఓ యువకుడిని ప్రేమించి ఇంట్లోనుంచి పారిపోయినట్టు తెలుస్తోంది. అయితే, ఆ యువకుడి కుటుంబంతో తలెత్తిన వివాదాల నేపథ్యంలో తల్లిదండ్రులు ఆమెను తిరిగి ఇంటికి తీసుకువచ్చారు. కులాంతర వివాహం, వయసు చట్టబద్ధం కానందున ఈ సంబంధం సరైనది కాదని పెద్దలు అభ్యంతరం తెలిపారు.

ఈ ఘటన తర్వాత అక్కచెల్లెళ్ళు ఇద్దరూ కుటుంబ నియమాలను పట్టించుకోకుండా ప్రవర్తించేవారని స్థానికులు చెబుతున్నారు. ఇటీవల తల్లిదండ్రులు వారికి చదువుపై దృష్టి పెట్టాలని, తగిన మార్గంలో నడవాలని బుద్ధిచెప్పగా, ఈ మందలింపును తట్టుకోలేకపోయిన అక్క చెల్లెలు శనివారం మధ్యాహ్నం ఇంట్లో ఎవరూ లేని సమయంలో కిటికీకి చున్నీతో ఉరివేసుకుని ఆత్మహత్యకు పాల్పడ్డారు.

విషయం తెలుసుకున్న కుటుంబ సభ్యులు వెంటనే పోలీసులకు సమాచారం అందించగా, బాలాపూర్ పోలీసులు ఘటన స్థలానికి చేరుకొని మృతదేహాలను ఉస్మానియా దవాఖానకు తరలించారు. కేసు నమోదు చేసి దర్యాప్తు ప్రారంభించారు. ఈ ఘటన స్థానికంగా తీవ్ర విషాదాన్ని నింపింది.

తల్లిదండ్రుల కళ్లముందే రెండు ప్రాణాలు లేకుండా పోవడం తీవ్ర దిగ్భ్రాంతికి గురిచేసింది. మానసిక ఒత్తిడులు, మైనర్ల లోపలి భావోద్వేగాలు, కుటుంబ సంబంధాల కీలకతపై మరింత అవగాహన అవసరమని సామాజిక వర్గాలు వ్యాఖ్యానించాయి.