ఈనెల 30న సీఎస్ రిటైర్మెంట్‌... పదవీకాలం పొడిగింపుపై పక్కా సూచనలు..!

 

హైదరాబాద్‌, తెలంగాణ రాష్ట్ర ప్రభుత్వ ప్రధాన కార్యదర్శి (CS) ఎ. రామకృష్ణారావు ఈ నెల 30వ తేదీన పదవీ విరమణ చేయనున్నట్లు అధికార వర్గాలు వెల్లడించాయి. అయితే, ఆయన పదవీకాలాన్ని మరింతగా పొడిగించాలన్న యోచనలో రాష్ట్ర ప్రభుత్వం ఉందని సమాచారం. దీనిపై అధికారిక ప్రకటన వెలువడనుండగా, ఇప్పటికే ఈ మేరకు సంబంధిత దస్త్రాలు సిద్ధం చేసినట్లు తెలుస్తోంది.

రాష్ట్ర విభజన తర్వాత ఫైనాన్స్ ప్రిన్సిపల్ సెక్రటరీగా ఆయన ముఖ్య భూమిక పోషించారు. ఆర్థిక వ్యవహారాల్లో ఎంతో అనుభవం కలిగిన సీనియర్ ఐఏఎస్ అధికారి అయిన రామకృష్ణారావు, రాష్ట్ర ఆర్థిక విధాన రూపకల్పన, ఖర్చుల నియంత్రణ, బడ్జెట్‌ తయారీ వంటి కీలక అంశాల్లో నైపుణ్యాన్ని ప్రదర్శించారు.

తాజాగా సీఎస్‌గా బాధ్యతలు స్వీకరించిన తర్వాత కూడా పాలనా వ్యవస్థను సమర్థవంతంగా నడిపించడంలో ఆయన పాత్ర ప్రశంసనీయం. ముఖ్యమంత్రి రేవంత్ రెడ్డి నూతన పాలనలో ఆయనకు కీలక స్థానం ఉండటంతో పాటు, తాజా పరిపాలనా మార్పులల్లో కూడా ఆయన సలహాలు కీలకంగా నిలిచినట్లు సమాచారం.

ప్రస్తుతం రాష్ట్రంలో ఎన్నికల ఏర్పాట్లు, పలు ప్రాధాన్య ప్రాజెక్టుల అమలు వంటి అంశాల్లో కొనసాగుతున్న ప్రగతిని దృష్టిలో పెట్టుకుని ఆయన సేవలను కొంతకాలం మరింత కొనసాగించాలన్న ప్రభుత్వ యోచనకు గవర్నర్ అనుమతిని తీసుకునే ప్రయత్నాలు జరుగుతున్నట్లు తెలుస్తోంది.

ఇక వచ్చే రోజుల్లో అధికారికంగా పదవీకాల పొడిగింపుపై స్పష్టత రానుంది. ప్రభుత్వ నిర్ణయం ఎలా ఉంటుందన్నది రాజకీయ, అధికార వర్గాల్లో ఆసక్తికర చర్చకు దారి తీస్తోంది.