రేపు తెలంగాణ బంద్‌ — డీజీపీ శివధర్ రెడ్డి హెచ్చరిక
హైదరాబాద్‌: రాష్ట్రవ్యాప్తంగా రేపు జరగనున్న తెలంగాణ బంద్‌ నేపథ్యంలో పోలీస్‌ విభాగం అప్రమత్తమైంది. ఈ బంద్‌ను శాంతియుతంగా, చట్టబద్ధంగా నిర్వహించాలని డైరెక్టర్ జనరల్ ఆఫ్ పోలీస్‌ బి. శివధర్ రెడ్డి పిలుపునిచ్చారు.
బంద్‌ పేరుతో ఎవరు అవాంచనీయ ఘటనలకు పాల్పడినా, చట్టవ్యతిరేక చర్యలు చేపట్టినా వారిపై కఠిన చర్యలు తప్పవని ఆయన హెచ్చరించారు. రాష్ట్రవ్యాప్తంగా పోలీసు సిబ్బంది, నిఘా బృందాలు ఎప్పటికప్పుడు పరిస్థితులను పర్యవేక్షిస్తాయని డీజీపీ తెలిపారు. ప్రజలకు ఇబ్బందులు కలగకుండా అన్ని జాగ్రత్తలు తీసుకోవాలని జిల్లా, నగర పోలీసు అధికారులకు సూచించారు.
డీజీపీ మాట్లాడుతూ, “బంద్‌ కార్యక్రమం కారణంగా సాధారణ ప్రజల దైనందిన జీవన విధానానికి అంతరాయం కలగకుండా జాగ్రత్తలు తీసుకోవాలి. ప్రజా ఆస్తులకు నష్టం కలిగించే చర్యలు ఎవరు చేసినా వారిని వదలము” అని స్పష్టం చేశారు.
ఇదిలా ఉండగా, 42 శాతం బీసీ రిజర్వేషన్ల అమలు కోసం బీసీ సంఘాల ఆధ్వర్యంలో రేపు రాష్ట్ర బంద్‌ పిలుపునిచ్చారు. ఈ బంద్‌కు అధికార కాంగ్రెస్ పార్టీతో పాటు బీజేపీ, బీఆర్‌ఎస్ మద్దతు ప్రకటించాయి.
ఇక బీసీ రిజర్వేషన్ల అంశంలో రాష్ట్ర ప్రభుత్వానికి సుప్రీంకోర్టు ఎదురుదెబ్బ తగిలింది. హైకోర్టు తీర్పును సవాల్ చేస్తూ రాష్ట్ర ప్రభుత్వం దాఖలు చేసిన *స్పెషల్ లీవ్ పిటిషన్ (SLP)*ను సుప్రీంకోర్టు తోసిపుచ్చింది. దీంతో పాత రిజర్వేషన్ల ప్రకారమే స్థానిక సంస్థల ఎన్నికలు జరగాలని కోర్టు స్పష్టం చేసింది.
ప్రధానాంశాలు:🔸 రేపు రాష్ట్రవ్యాప్తంగా బంద్‌ పిలుపు🔸 బీసీ రిజర్వేషన్ల అమలుపై బీసీ సంఘాల ఆందోళన🔸 బంద్‌ శాంతియుతంగా జరగాలని డీజీపీ సూచన🔸 చట్టవ్యతిరేక చర్యలకు కఠిన చర్యలు తప్పవు.
Post a Comment