ప్యాసింజర్ రైలు ఇంజిన్ వెనుక భాగంలో ఉన్న బోగీలో మంటలు – ప్రయాణికుల్లో ఆందోళన

వికారాబాద్, డిసెంబర్ 18: వికారాబాద్ జిల్లా శంకర్‌పల్లి సమీపంలో ప్యాసింజర్ రైలులో ఒక్కసారిగా మంటలు చెలరేగడం కలకలం రేపింది. రైలు ప్రయాణిస్తున్న సమయంలో ఇంజిన్ వెనుక భాగంలో ఉన్న బోగీలో నుంచి పొగలు, మంటలు వస్తున్నట్లు గమనించిన లోకో పైలట్లు అప్రమత్తమయ్యారు. వెంటనే రైలును ఆపి, తమ సిబ్బంది సహాయంతో మంటలను అదుపులోకి తీసుకొచ్చారు.

ఈ ఘటన సమయంలో బోగీలో ప్రయాణికులు ఉన్నప్పటికీ, లోకో పైలట్ల చాకచక్యంతో పెద్ద ప్రమాదం తప్పింది. మంటలు పూర్తిగా ఆరిన అనంతరం, రైలును జాగ్రత్తగా వికారాబాద్ స్టేషన్ వరకు తీసుకువచ్చి అక్కడ నిలిపేశారు. దీంతో కొద్దిసేపు రైలు రాకపోకలకు అంతరాయం ఏర్పడింది.

ఈ సంఘటనలో ఎలాంటి ప్రాణనష్టం గానీ, గాయాలు గానీ సంభవించలేదని రైల్వే అధికారులు స్పష్టం చేశారు. మంటలు ఎలా చెలరేగాయన్న విషయంపై సాంకేతిక బృందం దర్యాప్తు ప్రారంభించినట్లు తెలిపారు. ఎలక్ట్రికల్ లోపమా? లేక ఇతర కారణాలా అన్న దానిపై పూర్తిస్థాయి విచారణ చేపడతామని పేర్కొన్నారు.

ప్రమాదం తప్పడంతో ప్రయాణికులు ఊపిరి పీల్చుకున్నారు. భవిష్యత్తులో ఇలాంటి ఘటనలు పునరావృతం కాకుండా అవసరమైన అన్ని భద్రతా చర్యలు తీసుకుంటామని రైల్వే అధికారులు హామీ ఇచ్చారు.