ఈనెల 31 నుంచి పార్లమెంటు బడ్జెట్ సమావేశాలు

హైదరాబాద్, జనవరి 06 : పార్లమెంటు బడ్జెట్ సమావేశాలు ఈ నెల 31వ తేదీ నుంచి ప్రారంభం కానున్నాయి. ఈ మేరకు కేంద్ర ప్రభుత్వం అధికారికంగా షెడ్యూల్‌ను ప్రకటించింది. బడ్జెట్ సమావేశాల తొలి రోజైన జనవరి 31న పార్లమెంటు ఉభయ సభలు సమావేశమవుతాయి. ఈ సందర్భంగా రాష్ట్రపతి ద్రౌపతి ముర్ము పార్లమెంటు ఉభయ సభలను ఉద్దేశించి ప్రసంగించనున్నారు. దేశ ఆర్థిక పరిస్థితి, ప్రభుత్వ విధానాలు, భవిష్యత్ కార్యాచరణపై రాష్ట్రపతి ప్రసంగం ఉండనుంది.

ఫిబ్రవరి 1వ తేదీన కేంద్ర ఆర్థిక మంత్రి లోక్‌సభలో కేంద్ర బడ్జెట్‌ను ప్రవేశపెట్టనున్నారు. ఈసారి ప్రత్యేకత ఏమిటంటే, తొలిసారిగా రాజ్యసభలో ఆదివారం రోజున బడ్జెట్ ప్రవేశపెట్టనుండటం రాజకీయ వర్గాల్లో చర్చనీయాంశంగా మారింది. సాధారణంగా పని దినాల్లోనే బడ్జెట్ ప్రవేశపెట్టే సంప్రదాయం ఉండగా, ఈసారి ఆదివారం రోజున జరగడం విశేషంగా భావిస్తున్నారు.

ఈ బడ్జెట్ సమావేశాల్లో కేంద్ర ప్రభుత్వం పలు కీలక బిల్లులను ప్రవేశపెట్టే అవకాశం ఉందని తెలుస్తోంది. ముఖ్యంగా దేశవ్యాప్తంగా ఒకే సమయంలో ఎన్నికలు నిర్వహించాలనే లక్ష్యంతో రూపొందించిన “వన్ నేషన్ – వన్ ఎలక్షన్” బిల్లుపై విస్తృత చర్చ జరగనుందని సమాచారం. ఈ బిల్లు అమలులోకి వస్తే లోక్‌సభ, అసెంబ్లీ ఎన్నికలు ఒకేసారి నిర్వహించే విధానం అమలవుతుందని నిపుణులు పేర్కొంటున్నారు.

అలాగే, ప్రజాప్రతినిధుల బాధ్యతను పెంచే దిశగా మరో కీలక బిల్లుపై కూడా చర్చ జరగనుంది. ఒకవేళ ఎవరైనా ముఖ్యమంత్రి లేదా మంత్రి 30 రోజుల పాటు జైల్లో ఉంటే, వారిని పదవి నుంచి తొలగించే నిబంధనలతో కూడిన బిల్లును ప్రభుత్వం సభలో ప్రవేశపెట్టే అవకాశముందని రాజకీయ వర్గాల్లో చర్చ సాగుతోంది.

ఈ కీలక బిల్లులు పార్లమెంటులో ఆమోదం పొందితే, దేశ రాజకీయ వ్యవస్థలో గణనీయమైన మార్పులు చోటుచేసుకునే అవకాశం ఉందని రాజకీయ విశ్లేషకులు అభిప్రాయపడుతున్నారు. ముఖ్యంగా ఎన్నికల విధానం, ప్రజాప్రతినిధుల బాధ్యత, పరిపాలనా సంస్కరణల విషయంలో కొత్త అధ్యాయం ప్రారంభమయ్యే సూచనలు కనిపిస్తున్నాయి.

బడ్జెట్ సమావేశాల నేపథ్యంలో దేశవ్యాప్తంగా రాజకీయ వాతావరణం వేడెక్కనుండగా, కేంద్ర బడ్జెట్‌లో మధ్యతరగతి, రైతులు, యువత, ఉద్యోగ వర్గాలకు ఎలాంటి ప్రయోజనాలు కల్పిస్తారన్నదానిపై ప్రజల్లో ఆసక్తి నెలకొంది.