గాలి పటాలు ఎగరేస్తున్న బాలుడిపై వీధి కుక్కల దాడి.. అంబర్పేట్లో కలకలం
హైదరాబాద్, జనవరి 04: హైదరాబాద్ నగరంలోని అంబర్పేట్ ప్రాంతంలో హృదయవిదారక ఘటన చోటుచేసుకుంది. గాలి పటాలు ఎగరేస్తూ ఆనందంగా ఆడుకుంటున్న 8 సంవత్సరాల బాలుడిపై వీధి కుక్కలు అకస్మాత్తుగా దాడి చేయడంతో తీవ్రంగా గాయపడాడు.
స్థానికుల కథనం ప్రకారం, అంబర్పేట్ పరిధిలోని ఒక కాలనీలో బాలుడు తన స్నేహితులతో కలిసి గాలిపటాలు ఎగరేస్తుండగా, ఒక్కసారిగా అక్కడే ఉన్న వీధి కుక్కలు అతనిపై దాడి చేశాయి. బాలుడిని చుట్టుముట్టి కాళ్లు, చేతులపై తీవ్రంగా కరిచినట్లు తెలుస్తోంది.
బాలుడి కేకలు విన్న స్థానికులు వెంటనే అక్కడికి చేరుకుని కుక్కలను తరిమికొట్టారు. అనంతరం తీవ్రంగా గాయపడిన బాలుడిని సమీపంలోని ఆస్పత్రికి తరలించారు. ప్రస్తుతం బాలుడు చికిత్స పొందుతున్నట్లు వైద్యులు తెలిపారు. అతని పరిస్థితి నిలకడగా ఉందని సమాచారం.
ఈ ఘటనతో ఆ ప్రాంత ప్రజలు భయాందోళనకు గురయ్యారు. కాలనీలో వీధి కుక్కల సంఖ్య అధికంగా ఉండటంతో చిన్నపిల్లలు బయట ఆడాలంటేనే భయపడాల్సిన పరిస్థితి ఏర్పడిందని స్థానికులు ఆవేదన వ్యక్తం చేస్తున్నారు.
ఈ ఘటనపై జీహెచ్ఎంసీ అధికారులు స్పందించి, వీధి కుక్కల నియంత్రణకు చర్యలు చేపడతామని హామీ ఇవ్వాలని స్థానికులు కోరుతున్నారు.
Post a Comment