సీజ్ చేసిన ఆటోను ఇవ్వకపోతే పామును వదులుతా – ట్రాఫిక్ పోలీసులను బెదిరించిన ఆటో డ్రైవర్

హైదరాబాద్: పాతబస్తీ పరిధిలోని చంద్రాయణగుట్టలో శనివారం రాత్రి ట్రాఫిక్ పోలీసులు నిర్వహించిన డ్రంక్ అండ్ డ్రైవ్ తనిఖీల్లో ఓ విచిత్ర ఘటన చోటుచేసుకుంది. మద్యం మత్తులో ఆటో నడుపుతున్న డ్రైవర్‌ను గుర్తించిన పోలీసులు వాహనాన్ని ఆపి తనిఖీలు చేపట్టారు.

తనిఖీల్లో డ్రైవర్ మద్యం సేవించినట్లు నిర్ధారణ కావడంతో అతడిపై కేసు నమోదు చేసి ఆటోను సీజ్ చేశారు. అయితే, సీజ్ చేసిన ఆటోను తిరిగి ఇవ్వాలంటూ డ్రైవర్ పోలీసులతో వాగ్వాదానికి దిగాడు. అంతేకాదు, “ఆటోను ఇవ్వకపోతే పామును వదులుతా” అంటూ ట్రాఫిక్ పోలీసులను బెదిరించడం కలకలం రేపింది.

డ్రైవర్ ప్రవర్తనతో అప్రమత్తమైన పోలీసులు వెంటనే పరిస్థితిని అదుపులోకి తీసుకుని, అదనపు బలగాలను పిలిపించారు. ప్రజా భద్రతకు విఘాతం కలిగించేలా వ్యవహరించినందుకు డ్రైవర్‌పై మరిన్ని సెక్షన్ల కింద కేసులు నమోదు చేసినట్లు సమాచారం.

డ్రంక్ అండ్ డ్రైవ్ వంటి ప్రమాదకర చర్యల వల్ల రోడ్డు ప్రమాదాలు పెరిగే అవకాశముందని, నిబంధనలు ఉల్లంఘించిన వారిపై కఠిన చర్యలు తప్పవని ట్రాఫిక్ అధికారులు హెచ్చరించారు. ప్రజలు బాధ్యతాయుతంగా వాహనాలు నడిపి సహకరించాలని కోరారు.