15 లక్షల లంచం తీసుకుంటూ ఏసీబికి రెడ్‌హ్యాండెడ్‌గా పట్టుబడ్డ ఎస్‌ఈ చిన్నారెడ్డి

జిహెచ్‌ఎంసీ సూపరింటెండింగ్ ఇంజనీర్ రూ.15 లక్షల లంచం తీసుకుంటూ రెడ్‌హ్యాండెడ్‌గా పట్టుబడ్డ ఎస్‌ఈ చిన్నారెడ్డి

హైదరాబాద్‌: జిహెచ్‌ఎంసీ కూకట్‌పల్లి జోన్‌లో భారీ లంచం వ్యవహారం వెలుగులోకి వచ్చింది. కూకట్‌పల్లి జోన్ సూపరింటెండింగ్ ఇంజనీర్ కార్యాలయంలో పనిచేస్తున్న సూపరింటెండింగ్ ఇంజనీర్ (ఎస్‌ఈ) పొద్దుటూరి చిన్నారెడ్డి, ఒక అధికారిక సహాయం చేయడానికి ఫిర్యాదుదారుడి నుండి రూ.15 లక్షల లంచం డిమాండ్ చేసినట్లు ఏసీబీ అధికారులు గుర్తించారు.

ఫిర్యాదుదారుడు పూర్తి చేసిన పనులను తనిఖీ చేసి, రూ.1,40,00,000/- విలువైన బిల్లులను ఆమోదం కోసం జోనల్ కమిషనర్‌కు పంపేందుకు లంచం కావాలని ఎస్‌ఈ చిన్నారెడ్డి డిమాండ్ చేసినట్లు సమాచారం. ఈ లంచం మొత్తాన్ని తన కార్యాలయంలో పనిచేస్తున్న అవుట్‌సోర్సింగ్ కంప్యూటర్ ఆపరేటర్ బాలసాని ప్రవీణ్ కుమార్ ద్వారా స్వీకరిస్తుండగా, తెలంగాణ అవినీతి నిరోధక శాఖ (ACB) అధికారులు రెడ్‌హ్యాండెడ్‌గా పట్టుకున్నారు.

ఈ ఘటనపై కేసు నమోదు చేసి, మరింత విచారణ చేపట్టినట్లు ఏసీబీ అధికారులు తెలిపారు.