మృతి చెందిన ఎక్సైజ్ కానిస్టేబుల్ కుటుంబానికి రూ.1 కోటి పరిహారం

నిజామాబాద్, ఫిబ్రవరి: ఇటీవల విధి నిర్వహణలో ప్రాణాలు కోల్పోయిన ఎక్సైజ్ కానిస్టేబుల్ గాజుల సౌమ్య కుటుంబానికి రాష్ట్ర ప్రభుత్వం తరఫున రూ.1 కోటి రూపాయల పరిహారాన్ని ముఖ్యమంత్రి  ఎ. రేవంత్ రెడ్డి అందజేశారు.

‘ప్రజా పాలన – ప్రగతి బాట’ కార్యక్రమంలో భాగంగా నిజామాబాద్ జిల్లా డిచ్‌పల్లి మండలం బర్దిపూర్ గ్రామంలో ఏర్పాటు చేసిన బహిరంగ సభ వేదికగా, సీఎం రేవంత్ రెడ్డి గాజుల సౌమ్య తల్లి సహా ఇతర కుటుంబ సభ్యులకు రూ.1 కోటి చెక్కును స్వయంగా అందజేశారు.

ఈ సందర్భంగా ముఖ్యమంత్రి మాట్లాడుతూ, విధి నిర్వహణలో ప్రాణాలు కోల్పోయిన ఉద్యోగుల కుటుంబాలకు ప్రభుత్వం ఎల్లప్పుడూ అండగా ఉంటుందని భరోసా ఇచ్చారు. గాజుల సౌమ్య త్యాగాన్ని ప్రభుత్వం ఎప్పటికీ మరిచిపోదని, ఆమె కుటుంబానికి అన్ని విధాలా సహాయం అందిస్తామని తెలిపారు.