ఇబ్రహీంపట్నం మండలంలో అనుమానాస్పద స్థితిలో ఓ వ్యక్తి మృతి

జగిత్యాల జిల్లా: జగిత్యాల జిల్లాలోని ఇబ్రహీంపట్నం మండలంలో అనుమానాస్పద స్థితిలో ఓ వ్యక్తి మృతి చెందిన ఘటన స్థానికంగా కలకలం రేపింది. ఘటనతో గ్రామంలో భయాందోళన వాతావరణం నెలకొంది.

స్థానికుల వివరాల ప్రకారం, జగిత్యాల జిల్లా మల్లాపూర్ మండలం మొగిలిపేట గ్రామానికి చెందిన ఎర్రోళ్ల లింబాద్రి (40) కొద్ది రోజుల క్రితం ఇబ్రహీంపట్నం మండలం ఎర్దండి గ్రామానికి చెందిన ఓ మహిళను వివాహం చేసుకున్నాడు. వీరికి ఒక కుమార్తె, ఒక కుమారుడు ఉన్నారు. అయితే దంపతుల మధ్య విభేదాలు తలెత్తడంతో వారు విడాకులు తీసుకుని వేరువేరుగా జీవనం సాగిస్తున్నారు.

ఈ నేపథ్యంలో శుక్రవారం లింబాద్రి ఎర్దండి గ్రామానికి వచ్చి, తన మాజీ అత్తగారింటి వద్ద చిన్న వాగ్వాదానికి దిగినట్లు సమాచారం. అనంతరం తెల్లవారుజామున అదే గ్రామానికి చెందిన ఓ వ్యక్తి వ్యవసాయ భూమిలో లింబాద్రి మృతదేహం కనబడటంతో గ్రామస్తులు ఒక్కసారిగా షాక్‌కు గురయ్యారు. వెంటనే పోలీసులకు సమాచారం అందించారు.

సూచన అందుకున్న పోలీసులు ఘటనా స్థలానికి చేరుకుని మృతదేహాన్ని పరిశీలించి, కేసు నమోదు చేసి దర్యాప్తు ప్రారంభించారు. లింబాద్రి ఆత్మహత్య చేసుకున్నాడా? లేక ఎవరైనా హత్య చేశారా? అనే కోణంలో విచారణ కొనసాగుతోంది.

ఈ సంఘటనతో గ్రామంలో ఉద్రిక్తత వాతావరణం నెలకొనగా, పూర్తి వివరాలు పోలీసుల దర్యాప్తులో వెల్లడి కానున్నాయి.