పాడైపోతున్న పల్లె ప్రకృతి వనాలు – పట్టించుకునే వారు ఎవరూ లేరా?

భద్రాద్రి కొత్తగూడెం జిల్లాలో గ్రామీణ ప్రాంతాల అభివృద్ధి, పర్యావరణ పరిరక్షణ లక్ష్యంగా ఏర్పాటు చేసిన పల్లె ప్రకృతి వనాలు ప్రస్తుతం నిర్లక్ష్యానికి గురవుతున్నాయి. ఎంతో వ్యయప్రయాసలతో నిర్మించిన ఈ వనాలు నిర్వహణ లోపంతో పాడైపోతున్నాయని గ్రామస్తులు ఆవేదన వ్యక్తం చేస్తున్నారు.

గ్రామాల్లో పచ్చదనం పెంపొందించేందుకు, ప్రజలకు విశ్రాంతి వాతావరణం కల్పించేందుకు, చిన్నారులకు ఆట స్థలంగా ఉపయోగపడేందుకు ఏర్పాటు చేసిన ఈ వనాలు ఇప్పుడు శిథిలావస్థకు చేరుతున్నాయి. చెట్లు, పూల మొక్కలు నీటి లేమితో ఎండిపోతుండగా, చుట్టూ పెరిగిన ముళ్లచెట్లు వనాల అందాన్ని మసకబార్చుతున్నాయి.

ప్రత్యేకంగా ఇటీవల ఎన్నికైన కొంతమంది సర్పంచులు పదవీ బాధ్యతలు స్వీకరించి రెండు నెలలు దాటినా పల్లె ప్రకృతి వనాల వైపు కన్నెత్తి చూడటం లేదని స్థానికులు విమర్శిస్తున్నారు. వనాలలో ఏర్పాటు చేసిన ఆట పరికరాలు, బెంచీలు దుమ్ము దూలితో కప్పబడి ఉపయోగించలేని స్థితికి చేరాయి. కొన్ని చోట్ల పరికరాలు దెబ్బతిని ప్రమాదకరంగా మారుతున్నాయని కూడా సమాచారం.

గ్రామాల్లో పర్యావరణ పరిరక్షణకు ప్రతీకలుగా నిలవాల్సిన ఈ పల్లె ప్రకృతి వనాలు నిర్వహణ లోపంతో తమ ఉద్దేశ్యాన్ని కోల్పోతున్నాయి. వనాల సంరక్షణ కోసం కేటాయించిన నిధులు సరైన విధంగా వినియోగం కావడం లేదనే ఆరోపణలు వినిపిస్తున్నాయి.

ఇప్పటికైనా సంబంధిత అధికారులు స్పందించి పల్లె ప్రకృతి వనాల పునరుద్ధరణకు చర్యలు తీసుకోవాలని ప్రజలు డిమాండ్ చేస్తున్నారు. చెట్లకు నీటిపారుదల సదుపాయం, శుభ్రత నిర్వహణ, భద్రతా చర్యలు చేపట్టి వనాలను తిరిగి ప్రజలకు ఉపయోగపడేలా చేయాలని కోరుతున్నారు.

పల్లె ప్రకృతి వనాలు కేవలం విశ్రాంతి కేంద్రాలు మాత్రమే కాకుండా గ్రామాల పచ్చని ఊపిరితిత్తులుగా నిలుస్తాయి. వాటి సంరక్షణ ప్రతి ఒక్కరి బాధ్యత అని గ్రామస్తులు స్పష్టం చేస్తున్నారు.