సిమెంట్-స్టీల్ ధరలు భారీగా పెంపు… నిర్మాణ రంగంపై యుద్ధ ప్రభావం

ఇళ్లు నిర్మించుకోవాలనుకుంటున్న వారికి మరో చేదు వార్త. నిర్మాణ రంగంలో కీలకమైన సిమెంట్, స్టీల్ ధరలు భారీగా పెరగనున్నాయి. పశ్చిమాసియాలో కొనసాగుతున్న ఇరాన్-ఇజ్రాయెల్ యుద్ధం ప్రభావం ఇప్పుడు భారత నిర్మాణ రంగంపై కూడా పడుతోంది.

కొత్త ఆర్థిక సంవత్సరం ప్రారంభం సందర్భంగా సిమెంట్, స్టీల్ కంపెనీలు ధరలు పెంచేందుకు సిద్ధమయ్యాయి. అధికారిక ప్రకటన త్వరలో వెలువడే అవకాశం ఉందని మార్కెట్ వర్గాలు చెబుతున్నాయి.

సిమెంట్ ధరలు ఇలా పెరుగనున్నాయి

ప్రస్తుతం మార్కెట్లో సిమెంట్ బస్తా ధర రూ.280 నుంచి రూ.320 మధ్య ఉంది. తాజా పెంపుతో ఒక్కో బస్తాపై సుమారు రూ.50 వరకు పెరుగుదల ఉండొచ్చని అంచనా. దీంతో ధర రూ.320 నుంచి రూ.370 మధ్యకు చేరే అవకాశం ఉంది.

ఈ పెరుగుదలకు ప్రధాన కారణాలు:

పెట్రోలియం కోక్ ధరలు 130 డాలర్ల నుంచి 165 డాలర్లకు పెరగడం
ఇండస్ట్రియల్ డీజిల్ ధరలు రూ.23.75 వరకు పెరగడం
రవాణా ఖర్చులు భారీగా పెరగడం

స్టీల్ ధరలు కూడా ఎగబాకే సూచనలు

స్టీల్ ధరలు కూడా తగ్గేలా లేవు. టన్నుకు సుమారు రూ.2,000 వరకు పెరిగే అవకాశం ఉందని సమాచారం. అంతర్జాతీయ మార్కెట్లో ముడి చమురు, బొగ్గు ధరలు పెరగడం దీనికి ప్రధాన కారణంగా చెప్పబడుతోంది.