ఆదివాసీ హక్కుల ఐక్యత సభ.. పాలకులపై ప్రొఫెసర్ హరగోపాల్ విమర్శలు

హనుమకొండ: ప్రొఫెసర్ హరగోపాల్ ఆదివాసీల పట్ల ప్రభుత్వాలు వివక్ష చూపుతున్నాయని, అటవీ మరియు ఖనిజ సంపదను దోచుకుంటూ వారి అభ్యున్నతిని విస్మరిస్తున్నాయని తీవ్ర విమర్శలు చేశారు. హనుమకొండలో ఆదివాసీ హక్కుల పోరాట సమితి ఆధ్వర్యంలో నిర్వహించిన ఐక్యత సభలో ఆయన ముఖ్య అతిథిగా పాల్గొని మాట్లాడారు.

ఈ సందర్భంగా ఆయన మాట్లాడుతూ.. భారత స్వాతంత్ర్యానికి ముందునుంచే ఆదివాసీలు తమ హక్కుల కోసం పోరాటాలు చేస్తున్నారని తెలిపారు. ఆదివాసీల చరిత్ర మొత్తం పోరాటాలతో నిండిపోయిందని పేర్కొన్నారు. అడవులను, ప్రకృతి సంపదను కాపాడేందుకు ఇప్పటికీ వారు నిరంతరం పోరాడుతూనే ఉన్నారని అన్నారు.

పాలకులు ఆదివాసీలకు హామీలు ఇస్తున్నప్పటికీ వాటిని అమలు చేయడంలో విఫలమవుతున్నారని హరగోపాల్ ఆరోపించారు. అభివృద్ధి పేరుతో అణచివేత కొనసాగుతోందని ఆవేదన వ్యక్తం చేశారు. అటవీ సంపదను దోచుకుంటున్న వారికే ప్రాధాన్యం ఇస్తున్నారని, కానీ అడవి బిడ్డలకు భరోసా ఇచ్చే పరిస్థితి లేకుండా పోయిందన్నారు.

ఖనిజ సంపదను తరలించుకుపోతున్నారని, కానీ ఆదివాసీల సంక్షేమాన్ని పట్టించుకోవడం లేదని మండిపడ్డారు. పెట్టుబడిదారులకు పాలకులు కొమ్ముకాస్తూ ఆదివాసీలను అణచివేతకు గురిచేస్తున్నారని విమర్శించారు. ఆదివాసీలు స్వార్థం లేని ప్రజలని, అందుకే అడవులు ఇంకా నిలిచి ఉన్నాయని ఆయన అభిప్రాయపడ్డారు.

సమస్యల పరిష్కారం కోసం ఆదివాసీలు సంఘటితంగా ముందుకు రావాలని, తమ హక్కుల కోసం పాలకులను ప్రశ్నించాలని హరగోపాల్ పిలుపునిచ్చారు.

ఈ సమావేశంలో ప్రొఫెసర్ వెంకట నారాయణ, ఉపేందర్తో పాటు వివిధ ఆదివాసీ సంఘాల నాయకులు, కార్యకర్తలు పాల్గొన్నారు.