వేసవిలో మూగజీవాల కష్టాలు.. నీటి తొట్టెలు నిరుపయోగం

పెద్దపల్లి జిల్లా: ప్రభుత్వం మూగజీవాల సంక్షేమం కోసం పలు పథకాలు అమలు చేస్తున్నప్పటికీ, క్షేత్రస్థాయిలో అధికారుల నిర్లక్ష్యం కారణంగా వాటి లక్ష్యం దెబ్బతింటోంది. వేసవి తీవ్రత పెరిగిన నేపథ్యంలో అడవులు, గ్రామాల పరిసర ప్రాంతాల్లో మూగజీవాల దాహార్తిని తీర్చేందుకు ఉపాధి హామీ పథకం కింద ఏర్పాటు చేసిన నీటి తొట్టెలు ప్రస్తుతం నిరుపయోగంగా మారాయి.

జిల్లాలోని పలు మండలాల్లో పశువుల కోసం లక్షల రూపాయల వ్యయంతో నిర్మించిన నీటి కొళాయిలు నిర్వహణ లేక వెలవెలబోతున్నాయి. ఎక్కడా ఒక్క చుక్క నీరు లేకపోవడంతో అవి కేవలం సిమెంట్ నిర్మాణాలుగానే మిగిలిపోయాయని స్థానికులు ఆవేదన వ్యక్తం చేస్తున్నారు.

వేసవి ఎండలు తీవ్రరూపం దాల్చడంతో గుంటలు, వాగులు పూర్తిగా ఎండిపోవడంతో అడవుల నుంచి వచ్చే మూగజీవాలు, మేతకు వెళ్లే పశువులు తాగునీటి కోసం తీవ్ర ఇబ్బందులు పడుతున్నాయి. నీటి కోసం కిలోమీటర్ల దూరం తిరగాల్సి వస్తోందని పశువుల కాపరులు చెబుతున్నారు.

ప్రభుత్వం మంచి ఉద్దేశంతో ఏర్పాటు చేసిన ఈ సదుపాయాలు నిర్వహణ లోపంతో ఉపయోగం లేకుండా పోతున్నాయని స్థానికులు విమర్శిస్తున్నారు. నోరులేని జీవాల దాహార్తిని గుర్తించి అధికారులు వెంటనే స్పందించాలని, నిర్మించిన వాటర్ ట్యాంకుల్లో తక్షణమే నీరు నింపేలా చర్యలు చేపట్టాలని ప్రజలు డిమాండ్ చేస్తున్నారు.