ధాన్యం, మక్కజొన్న తరలింపుపై అధికారుల ప్రత్యేక పర్యవేక్షణ

మహబూబాబాద్, మే 15: జిల్లాలో రైతుల నుంచి కొనుగోలు చేసిన ధాన్యం, మక్కజొన్నను వేగంగా మిల్లులు మరియు గోదాములకు తరలించే ప్రక్రియను జిల్లా యంత్రాంగం పకడ్బందీగా కొనసాగిస్తోంది. శుక్రవారం జిల్లాలోని వివిధ కొనుగోలు కేంద్రాల వద్ద నిల్వ ఉన్న ధాన్యం, మక్కజొన్నను సంబంధిత మిల్లులు, గోదాములకు తరలించేందుకు అధికారులు ప్రత్యేక చర్యలు చేపట్టారు.

రైతులు విక్రయించిన పంట ఎక్కువకాలం కొనుగోలు కేంద్రాల్లో నిల్వ ఉండకుండా, ఎలాంటి ఇబ్బందులు తలెత్తకుండా జిల్లా అధికారులు నిరంతరం పర్యవేక్షణ నిర్వహిస్తున్నారు. జిల్లా స్థాయి సీనియర్ అధికారులు, తహసీల్దార్లు, సంబంధిత శాఖల సిబ్బంది క్షేత్రస్థాయిలోనే ఉండి రవాణా ప్రక్రియను పరిశీలిస్తున్నారు.

కొనుగోలు కేంద్రాల్లో లారీల అందుబాటు, తూకం ప్రక్రియ, ధాన్యం నాణ్యత పరిశీలన, లోడింగ్ పనులు సజావుగా జరిగేలా చర్యలు తీసుకుంటున్నారు. వర్షాల పరిస్థితులను దృష్టిలో ఉంచుకుని ధాన్యం తడవకుండా జాగ్రత్తలు పాటించాలని అధికారులకు సూచనలు జారీ చేసినట్లు సమాచారం.

జిల్లా యంత్రాంగం రైతులకు ఎలాంటి ఇబ్బందులు కలగకుండా చర్యలు చేపడుతుండగా, కొనుగోలు చేసిన ప్రతి గింజను సకాలంలో మిల్లులకు తరలించేందుకు కృషి చేస్తోంది. రైతులు కూడా అధికారులతో సహకరించి కొనుగోలు ప్రక్రియను విజయవంతం చేయాలని అధికారులు కోరారు.