నాగార్జున స్కూల్ ప్రిన్సిపాల్ రూపారెడ్డి హత్య కేసులో సంచలన విషయాలు

నల్లగొండ జిల్లా కొండమల్లేపల్లిలో నాగార్జున స్కూల్ ప్రిన్సిపాల్ రూపారెడ్డి హత్య కేసులో పోలీసులు సంచలన విషయాలను వెల్లడించారు. రూపారెడ్డిని ఆమె వద్ద చదువుకున్న విద్యార్థులే హత్య చేసినట్లు దర్యాప్తులో తేలిందని జిల్లా ఎస్పీ శరత్ చంద్ర పవార్ తెలిపారు.

హత్య కేసు దర్యాప్తు కోసం ఐదు ప్రత్యేక బృందాలను ఏర్పాటు చేసిన పోలీసులు దాదాపు 70 సీసీ కెమెరాల ఫుటేజీలను పరిశీలించారు. హత్యకు ముందు రూపారెడ్డి తన పిన్నితో ఫోన్‌లో మాట్లాడుతూ ఓ వ్యక్తిని “బాబు” అని సంబోధించినట్లు పోలీసులు గుర్తించారు. స్కూల్‌లోని విద్యార్థులను కూడా ఆమె తరచూ “బాబు” అని పిలిచేదని తెలుసుకుని, విద్యార్థులపై దృష్టి సారించి విచారణ చేపట్టారు.

హత్య అనంతరం నాలుగు రోజుల పాటు స్కూల్‌కు సెలవులు ప్రకటించారు. స్కూల్ తిరిగి ప్రారంభమైన తర్వాత గైర్హాజరైన 13 మంది విద్యార్థులను పోలీసులు విచారించారు. వారిలో ఐదుగురు పదో తరగతి విద్యార్థులు ఉన్నారు. వీరిలో ఇద్దరు ఇటీవల డబ్బులు విచ్చలవిడిగా ఖర్చు చేస్తూ జల్సాలు చేస్తున్నట్లు గుర్తించిన పోలీసులు వారిని అదుపులోకి తీసుకుని విచారించారు.

వారిలో ఒకరి వద్ద రూ.1.54 లక్షల నగదు లభించింది. ఆ డబ్బు ఎక్కడి నుంచి వచ్చిందని ప్రశ్నించగా తల్లిదండ్రులు ఇచ్చారని చెప్పాడు. అయితే నగదు నోట్లపై రక్తపు మరకలు కనిపించడంతో వాటిని ఫోరెన్సిక్ ల్యాబ్‌కు పంపించారు. పరీక్షల్లో ఆ రక్తం రూపారెడ్డిదేనని నిర్ధారణ అయింది.

హాస్టల్ నుంచి డే స్కాలర్‌గా మార్చడంతో కోపం

నిందితుల్లో ఒకరు గతంలో హాస్టల్‌లో ఉండేవాడని పోలీసులు తెలిపారు. అతనికి మద్యం అలవాటు, బైకులపై ఆసక్తి ఉండేదని చెప్పారు. అతని బ్యాగులో నగదు, ఫోన్ గుర్తించిన రూపారెడ్డి మందలించి, హాస్టల్ నుంచి తొలగించి డే స్కాలర్‌గా మార్చినట్లు విచారణలో వెల్లడైంది. అప్పటి నుంచి ఆమెపై ఆ విద్యార్థి కోపం పెంచుకున్నట్లు పోలీసులు తెలిపారు.

డబ్బు కోసం రెక్కీ

నిందితుల్లో ఒకరు నెల రోజుల క్రితం గోవాకు వెళ్లినట్లు పోలీసులు గుర్తించారు. ఎలాగైనా డబ్బు సంపాదించాలనే ఆలోచనతో రూపారెడ్డి ఇంట్లో దొంగతనం చేయాలని నిర్ణయించుకున్నాడు. ఇందుకోసం హత్యకు ఐదు రోజుల ముందే ఆమె ఇంటి వద్ద రెక్కీ నిర్వహించినట్లు ఎస్పీ తెలిపారు.

రూపారెడ్డి ఇంట్లో స్కూల్ ఫీజు డబ్బులు ఉంటాయని నిందితులకు తెలుసు. ఈ నెల 11వ తేదీన స్కూల్‌ నుంచి ఇంటికి వచ్చిన తర్వాత ఇద్దరు నిందితులు మాస్కులు ధరించి గోడ దూకి ఇంట్లోకి ప్రవేశించారు.

అయితే నిందితుల్లో ఒకరి మాస్క్ జారిపడటంతో రూపారెడ్డి అతడిని గుర్తించినట్లు పోలీసులు తెలిపారు. దీంతో తమను గుర్తిస్తుందనే భయంతో ఆమెపై దాడికి పాల్పడ్డారు. కత్తితో 27 సార్లు పొడిచి హత్య చేసిన అనంతరం, కిందపడిపోయిన ఆమె ఫోన్‌ను తీసుకుని, ఇంట్లోని నగదును తీసుకుని అక్కడి నుంచి పరారయ్యారు.

నగదు, ఐఫోన్, ఫోన్ స్వాధీనం

నిందితుల నుంచి రూ.1.54 లక్షల నగదు, ఐఫోన్‌తో పాటు రూపారెడ్డి మొబైల్ ఫోన్‌ను పోలీసులు స్వాధీనం చేసుకున్నారు. నిందితులంతా మైనర్లు కావడంతో వారిని జువెనైల్ జస్టిస్ కోర్టు ముందు హాజరుపరచనున్నట్లు నల్లగొండ జిల్లా ఎస్పీ శరత్ చంద్ర పవార్ వెల్లడించారు.