నేడు తెలంగాణ కేబినెట్ సమావేశం.. కీలక నిర్ణయాలపై ఉత్కంఠ

Telangana Cabinet సమావేశం నేడు సాయంత్రం 4 గంటలకు హైదరాబాద్‌లోని Telangana Secretariatలో జరగనుంది. ముఖ్యమంత్రి A. Revanth Reddy అధ్యక్షతన జరిగే ఈ భేటీలో రాష్ట్రానికి సంబంధించిన పలు కీలక అంశాలపై చర్చించి నిర్ణయాలు తీసుకునే అవకాశం ఉందని సమాచారం.

ఈ సమావేశంలో ముఖ్యంగా రాష్ట్రంలో అమలు చేయనున్న పొదుపు చర్యలు, విద్యుత్ రంగ సంస్కరణలు ప్రధాన అజెండాగా ఉండనున్నాయి. డిస్కంల ఆర్థిక నష్టాలను తగ్గించేందుకు తీసుకోవాల్సిన చర్యలపై కేబినెట్ లోతుగా చర్చించనుంది. అలాగే జూన్ 2 నుంచి రైతు డిస్కం అమలు అంశంపై కూడా కీలక నిర్ణయం వెలువడే అవకాశముంది.

వ్యవసాయ రంగంలో విద్యుత్ వినియోగాన్ని తగ్గిస్తూ రైతులకు మేలు చేసే విధంగా పంప్‌సెట్ల ప్రోత్సాహక పథకాలపై చర్చించనున్నారు. కొండారెడ్డిపల్లి తరహాలో రాష్ట్రంలో మరికొన్ని సోలార్ విలేజెస్ ఏర్పాటు చేయాలనే ప్రతిపాదనపై కూడా కేబినెట్ దృష్టి సారించనుంది. అదేవిధంగా గ్రామీణ ప్రాంతాల్లో సోలార్ స్టౌ స్కీంను అమలు చేసే యోచనపై కూడా చర్చ జరగనుంది.

రాష్ట్రంలో విద్యుత్, పెట్రోల్, డీజిల్ వినియోగాన్ని తగ్గించేందుకు తీసుకోవాల్సిన చర్యలపై సమగ్రంగా చర్చించనున్న ప్రభుత్వం, ప్రభుత్వ శాఖల్లో ఎలక్ట్రిక్ వాహనాల వినియోగాన్ని పెంచే దిశగా కీలక నిర్ణయం తీసుకునే అవకాశముంది.

వ్యవసాయ రంగంలో పంటల మార్పిడి విధానాన్ని ప్రోత్సహించేందుకు రైతులకు ప్రత్యేక యాక్షన్ ప్లాన్ రూపొందించే అంశంపై కూడా కేబినెట్ చర్చించనుంది. మరోవైపు ఇందిరమ్మ కుటుంబ జీవిత బీమా పథకానికి సంబంధించిన విధివిధానాలను ఖరారు చేసే అవకాశం ఉంది. అలాగే రెండో విడత ఇందిరమ్మ ఇళ్ల నిర్మాణ కార్యక్రమంపై కూడా కీలక నిర్ణయాలు తీసుకునే సూచనలు కనిపిస్తున్నాయి.

ఇక వచ్చే నెల జరిగే తెలంగాణ ఆవిర్భావ వేడుకలను ఘనంగా నిర్వహించేందుకు అవసరమైన ఏర్పాట్లు, కార్యక్రమాలపై కూడా కేబినెట్ సమావేశంలో చర్చించనున్నారు.