అంగన్‌వాడీల్లో భారీ ఉద్యోగ భర్తీ.. 15,982 పోస్టులకు త్వరలో నోటిఫికేషన్

హైదరాబాద్, మే 22: తెలంగాణ ప్రభుత్వం రాష్ట్రంలోని నిరుద్యోగ మహిళలకు శుభవార్త చెప్పేందుకు సిద్ధమవుతోంది. రాష్ట్ర వ్యాప్తంగా అంగన్‌వాడీ కేంద్రాల్లో ఖాళీగా ఉన్న 15,982 పోస్టుల భర్తీకి ప్రభుత్వం కసరత్తు ప్రారంభించింది. ఈ పోస్టులకు సంబంధించి త్వరలోనే జిల్లా కలెక్టర్ల ఆధ్వర్యంలో నోటిఫికేషన్ విడుదల కానున్నట్లు సమాచారం.

2025-26 నాటికి పదోన్నతులు, పదవీ విరమణలు, ఇతర శాఖల్లో ఉద్యోగాలు పొందడం వల్ల ఏర్పడిన ఖాళీలను పరిగణనలోకి తీసుకుని ఈ నియామక ప్రక్రియ చేపడుతున్నారు. అదనంగా కొత్తగా ఏర్పాటైన 708 పోస్టులను కూడా ఈ భర్తీలో చేర్చనున్నట్లు తెలుస్తోంది.

మొత్తం ఖాళీల్లో:

• 12,882 హెల్పర్ పోస్టులు
• 3,100 టీచర్ పోస్టులు ఉన్నాయి.

రాష్ట్రవ్యాప్తంగా ప్రస్తుతం 35,781 అంగన్‌వాడీ కేంద్రాలు పనిచేస్తుండగా, సుమారు 71,562 మంది సిబ్బంది విధులు నిర్వహిస్తున్నారు. గత మూడు సంవత్సరాలుగా రిటైర్మెంట్లు, సూపర్‌వైజర్ ప్రమోషన్లు, ఇతర శాఖలకు బదిలీలు కారణంగా పెద్దఎత్తున ఖాళీలు ఏర్పడ్డాయి. ప్రస్తుతం అంగన్‌వాడీ విభాగంలో సుమారు 22.33 శాతం పోస్టులు ఖాళీగా ఉన్నట్లు సమాచారం.

త్వరలోనే మహిళా మరియు శిశు సంక్షేమ శాఖ నియామక విధానం, విద్యార్హతలు, వయోపరిమితి వంటి అంశాలపై స్పష్టత ఇవ్వనుంది. ముందుగా కొత్త నియామక విధానానికి ప్రభుత్వం ఆమోదం తెలిపిన తర్వాత జిల్లాల వారీగా నోటిఫికేషన్లు విడుదల చేయనున్నారు.

ఇక అంగన్‌వాడీ కేంద్రాల మౌలిక సదుపాయాల అభివృద్ధిపైనా ప్రభుత్వం దృష్టి సారించింది.

• 9 వేల కేంద్రాలకు విద్యుత్ కనెక్షన్లు
• 7,700 కేంద్రాలకు మరుగుదొడ్లు
• 5 వేల కేంద్రాల్లో ఆర్వో ప్లాంట్లు, ఎల్‌ఈడీ స్క్రీన్లు
• 3,300 కేంద్రాలకు తాగునీటి సదుపాయం
• 1,000 కేంద్రాలకు శాశ్వత భవనాలు ఏర్పాటు చేయనున్నట్లు సమాచారం.

మొత్తం మీద ఈ ఏడాది తెలంగాణ అంగన్‌వాడీ వ్యవస్థలో భారీ మార్పులు తీసుకురావడానికి ప్రభుత్వం చర్యలు చేపడుతోంది.