ఘోర రోడ్డు ప్రమాదం.. ఒకే కుటుంబానికి చెందిన ఐదుగురు మృతి

జాతీయ రహదారిపై జరిగిన భయానక రోడ్డు ప్రమాదంలో ఒకే కుటుంబానికి చెందిన ఐదుగురు దుర్మరణం పాలైన విషాద ఘటన కర్ణాటకలో చోటుచేసుకుంది. లాడ్లాపూర్ సమీపంలో వేగంగా వెళ్తున్న ఒక క్రూజర్ వాహనం ఎదురుగా వస్తున్న లారీని ముఖాముఖిగా ఢీకొట్టడంతో ఈ ఘోర ప్రమాదం సంభవించింది.

ప్రమాదం తీవ్రత ఎంతగా ఉందంటే, క్రూజర్ వాహనం ముందుభాగం పూర్తిగా నుజ్జునుజ్జయింది. వాహనంలో ప్రయాణిస్తున్న ఐదుగురు అక్కడికక్కడే ప్రాణాలు కోల్పోయారు. మృతులను క్యాష్వార్‌, హుస్సేన్‌ షా, మహబూబ్‌ అలీ, రసూల్‌ బీ, ఫాతిమా అలీలుగా పోలీసులు గుర్తించారు. వీరంతా ఒకే కుటుంబానికి చెందినవారని సమాచారం.

సమాచారం అందుకున్న వెంటనే స్థానిక పోలీసులు, అత్యవసర సిబ్బంది ఘటనాస్థలికి చేరుకుని సహాయక చర్యలు చేపట్టారు. ప్రమాదంలో నలిగిపోయిన వాహనం నుంచి మృతదేహాలను ఎంతో శ్రమించి బయటకు తీశారు. అనంతరం పోస్టుమార్టం నిమిత్తం సమీప ప్రభుత్వ ఆసుపత్రికి తరలించారు.

ప్రాథమిక విచారణలో డ్రైవర్ల అతివేగం, నిద్రమత్తు కారణంగానే ప్రమాదం జరిగి ఉండొచ్చని పోలీసులు అనుమానిస్తున్నారు. ఈ ఘటనపై కేసు నమోదు చేసి దర్యాప్తు కొనసాగిస్తున్నారు.

ఒకే కుటుంబానికి చెందిన ఐదుగురు సభ్యులు ఒక్కసారిగా మృతి చెందడంతో వారి స్వగ్రామంలో విషాద ఛాయలు అలముకున్నాయి. కుటుంబ సభ్యుల రోదనలు స్థానికులను కంటతడి పెట్టించాయి.