Hyderabadలో పెట్రోల్ మంట.. దేశంలోనే అత్యధిక ధరలు!

అంతర్జాతీయ మార్కెట్‌లో ముడి చమురు ధరలు పెరగడం, పశ్చిమ ఆసియాలో కొనసాగుతున్న ఉద్రిక్త పరిస్థితుల ప్రభావంతో దేశవ్యాప్తంగా ఇంధన ధరలు ఒక్కసారిగా భారీగా పెరిగాయి. చమురు మార్కెటింగ్ సంస్థలు (OMCs) మే 15న పెంచిన తాజా ధరలతో సామాన్య ప్రజలపై మరోసారి భారం పడింది.

తాజా పెంపుతో దేశంలోని ప్రధాన నగరాలన్నింటికంటే Hyderabadలోనే పెట్రోల్ ధర అత్యధికంగా నమోదైంది. నగరంలో లీటరు పెట్రోల్‌పై రూ. 3.39 పెరగడంతో ధర ప్రస్తుతం రూ. 110.89కు చేరుకుంది. దీంతో దేశంలోనే అత్యధిక పెట్రోల్ ధర ఉన్న నగరంగా హైదరాబాద్ నిలిచింది.

ఈ జాబితాలో Thiruvananthapuram రెండో స్థానంలో ఉంది. అక్కడ పెట్రోల్ ధర లీటరుకు రూ. 3.37 పెరిగి రూ. 110.75కు చేరింది. అనంతరం Kolkataలో రూ. 108.74, Patnaలో రూ. 108.55, Jaipurలో రూ. 108.19గా నమోదయ్యాయి. దేశ ఆర్థిక రాజధాని Mumbaiలో కూడా పెట్రోల్ ధర రూ. 106.64కు చేరి వాహనదారులకు షాక్ ఇచ్చింది.

పెట్రోల్‌తో పాటు డీజిల్ ధరలు కూడా భారీగా పెరిగాయి. దేశంలో అత్యధిక డీజిల్ ధర Thiruvananthapuramలో నమోదైంది. అక్కడ లీటరు డీజిల్‌పై రూ. 3.37 పెరిగి రూ. 99.63కు చేరి సెంచరీ మార్క్‌కు చేరువైంది.

డీజిల్ ధరల విషయంలో Hyderabad రెండో స్థానంలో నిలిచింది. నగరంలో లీటరు డీజిల్‌పై రూ. 3.26 పెరగడంతో ధర రూ. 98.96కు చేరింది. ఆ తర్వాత Bhubaneswarలో రూ. 96.11, Chennaiలో రూ. 95.47, Kolkataలో రూ. 95.13గా ఉన్నాయి.

ఇక దేశ రాజధాని New Delhiలో మాత్రం ఇతర మెట్రో నగరాలతో పోలిస్తే ఇంధన ధరలు కొంత తక్కువగా ఉన్నాయి. అక్కడ లీటరు పెట్రోల్ ధర రూ. 97.77 కాగా, డీజిల్ ధర రూ. 90.67గా కొనసాగుతోంది.

ఈ ఆకస్మిక ధరల పెరుగుదల రవాణా రంగంపై తీవ్ర ప్రభావం చూపే అవకాశముంది. ముఖ్యంగా సరుకు రవాణా ఖర్చులు పెరగడంతో నిత్యావసర వస్తువుల ధరలు కూడా మరింత పెరిగే అవకాశం ఉందని ఆర్థిక నిపుణులు అభిప్రాయపడుతున్నారు. సామాన్యుడి జేబుపై ఇంధన భారం మరింత పెరిగిందనే ఆందోళన వ్యక్తమవుతోంది.