ములుగు జిల్లాలో విషాదం.. పిడుగుపాటుకు రైతు సహా 21 ఆవులు మృతి

ములుగు, జూన్ 27: ములుగు జిల్లా తాడ్వాయి మండలం అంకంపల్లి గ్రామంలో శుక్రవారం రాత్రి విషాదకర ఘటన చోటుచేసుకుంది. భారీ వర్షం కురుస్తున్న సమయంలో పిడుగు పడటంతో రైతు మృతి చెందడంతో పాటు 21 ఆవులు అక్కడికక్కడే మృతి చెందాయి. ఈ ఘటన గ్రామంలో తీవ్ర విషాదాన్ని నింపింది.

స్థానికుల వివరాల ప్రకారం, పశువుల యజమాని సమ్మయ్య తన ఆవులను ఇంటి సమీపంలోని పొలంలో కట్టివేశాడు. రాత్రి సమయంలో భారీ వర్షంతో పాటు ఉరుములు, మెరుపులు సంభవించగా, ఒక్కసారిగా పిడుగు ఆ ప్రాంతంపై పడింది. దీంతో అక్కడే ఉన్న సమ్మయ్యతో పాటు 21 ఆవులు మృతిచెందినట్లు సమాచారం.

ఒక్కసారిగా రైతు ప్రాణాలు కోల్పోవడంతో పాటు భారీ సంఖ్యలో పశువులు మృతి చెందడంతో కుటుంబ సభ్యులు, గ్రామస్తులు కన్నీరుమున్నీరయ్యారు. ఈ ఘటనతో పశువుల యజమానికి భారీ ఆర్థిక నష్టం వాటిల్లింది.

సమాచారం అందుకున్న అధికారులు ఘటనాస్థలికి చేరుకుని పరిస్థితిని పరిశీలించారు. బాధిత కుటుంబానికి ప్రభుత్వం నుంచి తక్షణ సాయం అందించాలని గ్రామస్తులు కోరుతున్నారు. భారీ వర్షాల సమయంలో ప్రజలు, రైతులు చెట్ల కింద లేదా బహిరంగ ప్రదేశాల్లో ఉండకుండా జాగ్రత్తలు పాటించాలని అధికారులు సూచిస్తున్నారు.