తెలంగాణ సర్వే అండ్ ల్యాండ్ రికార్డ్స్ డిప్యూటీ డైరెక్టర్ నరహరి రావుపై అక్రమాస్తుల కేసు నమోదు

తెలంగాణ సర్వే అండ్ ల్యాండ్ రికార్డ్స్ డిప్యూటీ డైరెక్టర్ నరహరి రావుపై అక్రమాస్తుల కేసు నమోదు

హైదరాబాద్: తెలంగాణ సర్వే అండ్ ల్యాండ్ రికార్డ్స్ విభాగంలోని మల్టీ జోన్-2 డిప్యూటీ డైరెక్టర్ సుంకరి నరహరి రావుపై ఆదాయానికి మించిన ఆస్తుల (డిస్‌ప్రోపోర్షనేట్ అసెట్స్) కేసును అవినీతి నిరోధక శాఖ (ఏసీబీ) నమోదు చేసింది. ఉద్యోగ బాధ్యతల నిర్వహణలో అవినీతి పద్ధతులు, అనుమానాస్పద మార్గాల ద్వారా తనకు తెలిసిన ఆదాయ వనరులకు మించి ఆస్తులను కూడబెట్టినట్లు ఏసీబీ అధికారులు గుర్తించారు.

అవినీతి నిరోధక చట్టం-1988 (2018 సవరణ)లోని సెక్షన్ 13(1)(బి), 13(2) కింద శిక్షార్హమైన నేరంగా పరిగణిస్తూ, 2026 జూన్ 16న నరహరి రావు నివాసంతో పాటు ఆయన బంధువులు, బినామీలు, ఇతర అనుచరులకు చెందిన మొత్తం 9 ప్రాంతాల్లో ఏసీబీ అధికారులు సోదాలు నిర్వహించారు.

ఈ సోదాల్లో రంగారెడ్డి జిల్లాలో ఐదు ఓపెన్ ప్లాట్లకు సంబంధించిన పత్రాలు, మహేశ్వరంలో 1.24 ఎకరాల వ్యవసాయ భూమి, పుప్పాలగూడలోని హైరైజ్ భవనంలో 2,500 చదరపు అడుగుల విస్తీర్ణం గల ఫ్లాట్, నర్సింగిలో హైరైజ్ భవనంలో ఒక్కొక్కటి 1,860 చదరపు అడుగుల విస్తీర్ణం గల రెండు ఫ్లాట్లు, రాజేంద్రనగర్‌లో 1,377 చదరపు అడుగుల విస్తీర్ణం గల మరో ఫ్లాట్ ఉన్నట్లు గుర్తించారు.

అదేవిధంగా గచ్చిబౌలిలోని టీఎన్జీఓ కాలనీలో జీ+3 భవనం, ఛత్రినాకలో జీ+2 నివాస భవనం ఉన్నట్లు అధికారులు వెల్లడించారు.

నరహరి రావు నివాసంలో సుమారు రూ.1.54 కోట్ల నగదు, రూ.2.29 కోట్ల బ్యాంకు నిల్వలు, రూ.5.04 కోట్ల విలువైన ఫిక్స్‌డ్ డిపాజిట్లు, సుమారు 1.3 కిలోల బంగారు ఆభరణాలు, 8 కిలోల వెండి వస్తువులను అధికారులు స్వాధీనం చేసుకున్నారు. అలాగే నిందిత అధికారి భార్య పేరిట ఉన్న రెండు లాకర్లను కూడా గుర్తించగా, వాటిని విచారణలో భాగంగా త్వరలో తెరవనున్నారు.

అదనంగా కియా కేరెన్స్ స్మార్ట్‌స్ట్రీమ్ జీ1.5 6ఎంటీ (పెట్రోల్) కారు కూడా గుర్తించారు. సోదాల్లో ఇప్పటివరకు గుర్తించిన మొత్తం ఆస్తుల విలువ రూ.13,05,67,100 (రూ.13.05 కోట్లు)గా అధికారులు అంచనా వేశారు. అయితే స్థిరాస్తుల మార్కెట్ విలువ పత్రాల్లో పేర్కొన్న విలువ కంటే పలుమార్లు అధికంగా ఉండే అవకాశం ఉందని తెలిపారు.

మరిన్ని ఆస్తులపై ధ్రువీకరణ ప్రక్రియ కొనసాగుతోందని, కేసు దర్యాప్తు కొనసాగుతోందని ఏసీబీ అధికారులు వెల్లడించారు. నిందిత అధికారి సుంకరి నరహరి రావును నాంపల్లిలోని ఎస్‌పీఈ & ఏసీబీ కేసుల ప్రధాన ప్రత్యేక న్యాయమూర్తి ఎదుట జ్యుడీషియల్ రిమాండ్ కోసం హాజరుపరచనున్నారు.

లంచం డిమాండ్ చేసిన ప్రజాప్రతినిధులు లేదా ప్రభుత్వ ఉద్యోగులపై ఫిర్యాదులకు ఏసీబీ టోల్ ఫ్రీ నంబర్ 1064కు కాల్ చేయాలని అధికారులు సూచించారు. అదేవిధంగా వాట్సాప్ (9440446106), ఫేస్‌బుక్ (Telangana ACB), ఎక్స్ (@TelanganaACB) ద్వారా కూడా ఏసీబీని సంప్రదించవచ్చని తెలిపారు. ఫిర్యాదుదారుల వివరాలు పూర్తిగా గోప్యంగా ఉంచబడతాయని స్పష్టం చేశారు.