బెల్లంపల్లిలో అడవి పంది వేట కేసు.. ఐదుగురు అదుపులో, మాంసం స్వాధీనం

 

బెల్లంపల్లిలో అడవి పంది వేట కేసు.. ఐదుగురు అదుపులో, మాంసం స్వాధీనం

మంచిర్యాల జిల్లా బెల్లంపల్లి పరిధిలో అడవి పందిని వేటాడి చంపిన ఘటనలో అటవీ శాఖ అధికారులు ఐదుగురు నిందితులను అదుపులోకి తీసుకున్నారు. ఈ సందర్భంగా అడవి పంది మాంసాన్ని స్వాధీనం చేసుకున్నట్లు ఫారెస్ట్ రేంజ్ ఆఫీసర్ (ఎఫ్‌ఆర్‌ఓ) పూర్ణచందర్ తెలిపారు.

వివరాల ప్రకారం, బెల్లంపల్లి కన్నాల బస్తి రైల్వే ఓవర్ బ్రిడ్జి కింద అడవి పందిని వేటాడి చంపినట్లు అటవీ శాఖకు సమాచారం అందింది. దీంతో అధికారులు తనిఖీలు నిర్వహించగా, కన్నాల బస్తికి చెందిన శ్రీరాముల సమ్మయ్య అడవి పంది మాంసంతో పట్టుబడ్డాడు.

అతడిని విచారించగా, శ్రీరాముల రమేష్, చిలుకూరి వెంకట్, సుల్తాన్ నవీన్, పల్లంకొండ రామ్‌లతో కలిసి అడవి పందిని వేటాడి చంపినట్లు వెల్లడించినట్లు ఎఫ్‌ఆర్‌ఓ తెలిపారు. అనంతరం కేసు నమోదు చేసి ఐదుగురిని అదుపులోకి తీసుకున్న అధికారులు, వారి వద్ద నుంచి అడవి పంది మాంసాన్ని స్వాధీనం చేసుకున్నారు.

వన్యప్రాణులను వేటాడడం, వాటి మాంసాన్ని నిల్వ ఉంచడం లేదా విక్రయించడం చట్టరీత్యా నేరమని అధికారులు హెచ్చరించారు. వన్యప్రాణుల సంరక్షణ కోసం ప్రజలు సహకరించాలని, ఇటువంటి ఘటనలపై సమాచారం ఉంటే వెంటనే అటవీ శాఖకు తెలియజేయాలని సూచించారు.