రూ.2,000 నోట్లపై ఆర్బీఐ కీలక ప్రకటన.. వీలైనంత త్వరగా బ్యాంకింగ్ వ్యవస్థలో జమ చేయాలని ఆర్బీఐ సూచించింది

 

రూ.2,000 నోట్లపై ఆర్బీఐ కీలక ప్రకటన.. వీలైనంత త్వరగా బ్యాంకింగ్ వ్యవస్థలో జమ చేయాలని ఆర్బీఐ సూచించింది

హైదరాబాద్, జులై 9: దేశంలో రూ.2,000 నోట్ల చలామణిపై భారతీయ రిజర్వ్ బ్యాంక్ (ఆర్బీఐ) కీలక ప్రకటన విడుదల చేసింది. మార్కెట్లో ఉన్న రూ.2,000 నోట్లలో దాదాపు 98.47 శాతం నోట్లు ఇప్పటికే బ్యాంకింగ్ వ్యవస్థలోకి తిరిగి వచ్చాయని వెల్లడించింది. ప్రస్తుతం కేవలం రూ.5,451 కోట్ల విలువైన రూ.2,000 నోట్లు మాత్రమే ఇంకా ప్రజల వద్ద ఉన్నట్లు తెలిపింది.

ఆర్బీఐ 2023 మే 19న 'క్లీన్ నోట్ పాలసీ'లో భాగంగా రూ.2,000 నోట్లను చలామణి నుంచి ఉపసంహరిస్తున్నట్లు ప్రకటించింది. ఆ సమయంలో మార్కెట్లో మొత్తం రూ.3.56 లక్షల కోట్ల విలువైన రూ.2,000 నోట్లు చలామణిలో ఉండగా, బ్యాంకులు మరియు నిర్దేశిత కేంద్రాల ద్వారా వాటి డిపాజిట్, మార్పిడి ప్రక్రియ కొనసాగడంతో అధిక శాతం నోట్లు తిరిగి బ్యాంకింగ్ వ్యవస్థలోకి చేరాయి.

ఆర్బీఐ వెల్లడించిన తాజా గణాంకాల ప్రకారం, 2026 ఏప్రిల్ 30 నాటికి తిరిగి రాని రూ.2,000 నోట్ల విలువ కేవలం రూ.5,451 కోట్లకు మాత్రమే పరిమితమైంది.

అయితే, రూ.2,000 నోట్లను చలామణి నుంచి ఉపసంహరించినప్పటికీ అవి ఇప్పటికీ చట్టబద్ధమైన కరెన్సీగానే కొనసాగుతున్నాయని ఆర్బీఐ మరోసారి స్పష్టం చేసింది. ఎవరి వద్దైనా ఇంకా రూ.2,000 నోట్లు ఉంటే, వాటిని నిర్దేశిత ఆర్బీఐ కార్యాలయాల్లో లేదా ఆర్బీఐ సూచించిన విధానంలో తమ బ్యాంకు ఖాతాల్లో జమ చేసుకునే అవకాశం ఉందని తెలిపింది.

ప్రజలు తమ వద్ద ఉన్న రూ.2,000 నోట్లను వీలైనంత త్వరగా బ్యాంకింగ్ వ్యవస్థలో జమ చేయాలని ఆర్బీఐ సూచించింది