బడి పక్కనే నిప్పంటించుకుని ఉపాధ్యాయుడి ఆత్మహత్య.. విద్యార్థుల్లో విషాదం

 

బడి పక్కనే నిప్పంటించుకుని ఉపాధ్యాయుడి ఆత్మహత్య.. విద్యార్థుల్లో విషాదం

వైఎస్సార్ కడప జిల్లాలో విషాదకర ఘటన చోటుచేసుకుంది. గోపవరం మండలం రామిరెడ్డిపాలెం ఎస్టీ కాలనీలోని ప్రాథమిక పాఠశాలలో పనిచేస్తున్న ఉపాధ్యాయుడు గువ్వల మల్లెంకొండయ్య (45) సోమవారం పాఠశాల సమీపంలో ఒంటిపై పెట్రోల్ పోసుకుని నిప్పంటించుకుని ఆత్మహత్యకు పాల్పడ్డారు.

పోలీసుల వివరాల ప్రకారం.. బ్రాహ్మణపల్లె గ్రామానికి చెందిన మల్లెంకొండయ్య గత ఎనిమిదేళ్లుగా రామిరెడ్డిపాలెం పాఠశాలలో ఉపాధ్యాయుడిగా విధులు నిర్వహిస్తున్నారు. ఎప్పటిలాగే సోమవారం పాఠశాలకు వచ్చిన ఆయన సంచిలో పెట్రోల్ బాటిల్ తీసుకొచ్చారు. మధ్యాహ్నం 3 గంటల సమయంలో "ఇప్పుడే వస్తా" అని విద్యార్థులకు చెప్పి బయటకు వెళ్లిన ఆయన, పాఠశాలకు కొద్దిదూరంలోని నిర్మానుష్య ప్రాంతంలో ఒంటిపై పెట్రోల్ పోసుకుని నిప్పంటించుకున్నారు. మంటలు తీవ్రంగా వ్యాపించడంతో అక్కడికక్కడే మృతి చెందారు.

ఈ ఘటనను గమనించిన స్థానికులు వెంటనే 108 సిబ్బందికి, పోలీసులకు సమాచారం అందించారు. పాఠశాల సమీపంలోనే ఈ ఘటన జరగడంతో విద్యార్థులు తీవ్ర భయాందోళనకు గురై ఏడుస్తూ ఇళ్లకు వెళ్లిపోయారు. తల్లిదండ్రులు, తోటి ఉపాధ్యాయులు కూడా తీవ్ర దిగ్భ్రాంతికి లోనయ్యారు.

సమాచారం అందుకున్న విద్యాశాఖ అధికారులు ఘటనాస్థలానికి చేరుకుని పరిస్థితిని పరిశీలించారు. మల్లెంకొండయ్య విధినిర్వహణలో ఎప్పుడూ క్రమశిక్షణతో పనిచేసేవారని, మంచి ఉపాధ్యాయుడిగా పేరు సంపాదించుకున్నారని అధికారులు తెలిపారు.

బద్వేలు రూరల్ ఎస్‌ఐ రంగారావు ఆధ్వర్యంలో పోలీసులు కేసు నమోదు చేసి దర్యాప్తు చేపట్టారు. ఆత్మహత్యకు గల కారణాలపై విచారణ కొనసాగుతోంది. మృతదేహాన్ని పోస్టుమార్టం నిమిత్తం బద్వేలు ప్రభుత్వ ఆస్పత్రికి తరలించారు.

మల్లెంకొండయ్యకు భార్య శిరీష, పదో తరగతి చదువుతున్న కుమార్తె ఉన్నారు. కుటుంబ సభ్యుల రోదనలు అక్కడున్న వారిని కలచివేశాయి.

గమనిక: ఆత్మహత్యకు గల కారణాలు ఇంకా అధికారికంగా వెల్లడికాలేదు. పోలీసులు అన్ని కోణాల్లో దర్యాప్తు చేస్తున్నారు.