ఫోన్, బంగారం కోసం కన్నబిడ్డను విక్రయించిన దంపతులు.. ఏడుగురు అరెస్ట్

 

ఫోన్, బంగారం కోసం కన్నబిడ్డను విక్రయించిన దంపతులు.. ఏడుగురు అరెస్ట్

ఛత్రపతి సంభాజీనగర్: కన్న ప్రేమకు మచ్చ తెచ్చే ఘటన మహారాష్ట్రలో వెలుగుచూసింది. నెలరోజుల పసికందును తల్లిదండ్రులే రూ.1.20 లక్షలకు విక్రయించినట్లు పోలీసులు గుర్తించారు. బిడ్డను విక్రయించిన డబ్బుతో ఖరీదైన స్మార్ట్‌ఫోన్లు, బంగారు ఆభరణాలు కొనుగోలు చేసినట్లు దర్యాప్తులో వెల్లడైనట్లు సమాచారం.

పోలీసుల వివరాల ప్రకారం.. పసికందును విక్రయించిన 48 గంటల్లోనే నాందేడ్ మీదుగా తెలంగాణకు తరలించారు. ఈ క్రమంలో బిడ్డ పలువురి చేతులు మారినట్లు పోలీసులు గుర్తించారు. చివరకు హైదరాబాద్‌లో ఆ పసికందును రూ.3.50 లక్షలకు విక్రయించినట్లు దర్యాప్తులో తేలింది.

విషయం వెలుగులోకి రావడంతో పోలీసులు ప్రత్యేకంగా దర్యాప్తు చేపట్టారు. ఈ వ్యవహారంతో సంబంధం ఉన్న తల్లిదండ్రులతో పాటు మొత్తం ఏడుగురిని అరెస్టు చేశారు. హైదరాబాద్‌లో ఉన్న పసికందును పోలీసులు సురక్షితంగా రక్షించి, సంబంధిత అధికారుల సంరక్షణకు అప్పగించినట్లు సమాచారం.

కన్నబిడ్డను డబ్బు కోసం విక్రయించిన ఘటనపై పోలీసులు అన్ని కోణాల్లో దర్యాప్తు కొనసాగిస్తున్నారు. ఈ వ్యవహారంలో ఇంకా ఎవరెవరి ప్రమేయం ఉందనే అంశంపై కూడా ఆరా తీస్తున్నట్లు తెలుస్తోంది.