కేంద్ర హోంమంత్రి అమిత్ షా పర్యటనకు పకడ్బందీ భద్రతా ఏర్పాట్లు

 

కేంద్ర హోంమంత్రి అమిత్ షా పర్యటనకు పకడ్బందీ భద్రతా ఏర్పాట్లు

తూప్రాన్, అక్టోబర్ 2: కేంద్ర హోంమంత్రి అమిత్ షా అక్టోబర్ 4న మెదక్ జిల్లా బ్రహ్మణపల్లిలో పర్యటించనున్న నేపథ్యంలో అధికారులు పకడ్బందీ భద్రతా ఏర్పాట్లు చేపట్టారు. పర్యటనకు సంబంధించిన భద్రతా చర్యలపై తూప్రాన్ మున్సిపల్ కార్యాలయంలో శుక్రవారం అడ్వాన్స్ సెక్యూరిటీ లైజన్ (ASL) సమావేశం నిర్వహించారు.

మెదక్ జిల్లా ఎస్పీ డి.వి. శ్రీనివాసరావు ఐపీఎస్ ఆధ్వర్యంలో జరిగిన ఈ సమావేశానికి వివిధ శాఖల అధికారులు హాజరయ్యారు. సమావేశానికి ముందు అధికారులు కేంద్ర హోంమంత్రి అమిత్ షా పాల్గొనే అమూల్ మిల్క్ కంపెనీ భూమిపూజ స్థలం, హెలిప్యాడ్, సభా వేదిక తదితర ప్రాంతాలను పరిశీలించారు.

అనంతరం పర్యటనకు సంబంధించిన భద్రతా ప్రణాళిక, బందోబస్తు, రూట్ మ్యాప్, ట్రాఫిక్ నియంత్రణ, పార్కింగ్, వీఐపీ రాకపోకలు, అత్యవసర వైద్య సేవలు తదితర అంశాలపై సమగ్రంగా సమీక్షించారు.

ఈ సమావేశంలో మెదక్ జిల్లా పోలీసు అధికారులు, రెవెన్యూ, వైద్య ఆరోగ్య శాఖ, ఫుడ్ సేఫ్టీ, ఆర్‌అండ్‌బీ, ఐఎస్‌డబ్ల్యూ, సీఆర్‌పీఎఫ్ తదితర శాఖల అధికారులు పాల్గొన్నారు. సభా ప్రాంగణం, హెలిప్యాడ్, పర్యటన రూట్, పార్కింగ్ ప్రాంతాలు, ట్రాఫిక్ మళ్లింపులు, అత్యవసర సేవలు, రహదారుల పరిస్థితిపై అధికారులు చర్చించారు.

ఈ సందర్భంగా ఎస్పీ డి.వి. శ్రీనివాసరావు మాట్లాడుతూ కేంద్ర హోంమంత్రి పర్యటన నేపథ్యంలో భద్రతా ఏర్పాట్లలో ఎలాంటి లోటుపాట్లకు తావులేకుండా ముందస్తు ప్రణాళికతో చర్యలు చేపట్టాలని అధికారులను ఆదేశించారు. పర్యటనకు సంబంధించిన ప్రతి అంశాన్ని క్షుణ్ణంగా పరిశీలించి, క్షేత్రస్థాయిలో పరిస్థితులను ముందుగానే అంచనా వేసి అవసరమైన ఏర్పాట్లను పూర్తి చేయాలని సూచించారు.

సభా ప్రాంగణం, హెలిప్యాడ్, పర్యటన రూట్, పార్కింగ్ ప్రాంతాలు, వీఐపీ రాకపోకలతో పాటు ప్రజల రాకపోకలపై ప్రత్యేక దృష్టి సారించాలని ఎస్పీ సూచించారు. ట్రాఫిక్‌కు ఎలాంటి అంతరాయం కలగకుండా ముందస్తు ట్రాఫిక్ ప్రణాళికను అమలు చేయాలని, అవసరమైన ప్రాంతాల్లో ట్రాఫిక్ మళ్లింపులు చేపట్టాలని అధికారులకు సూచించారు.

రెవెన్యూ, వైద్య ఆరోగ్య, ఫుడ్ సేఫ్టీ, ఆర్‌అండ్‌బీ, ఐఎస్‌డబ్ల్యూ, సీఆర్‌పీఎఫ్ తదితర శాఖలు తమ పరిధిలోని ఏర్పాట్లను నిర్ణీత సమయంలో పూర్తి చేసి పోలీసు శాఖతో సమన్వయంతో పనిచేయాలని ఆదేశించారు. శాఖల మధ్య నిరంతరం సమాచార మార్పిడి కొనసాగించాలని, పర్యటనకు సంబంధించిన ప్రతి అంశంలో పరస్పర సమన్వయంతో ముందుకు సాగాలని సూచించారు.

కేంద్ర హోంమంత్రి అమిత్ షా పర్యటన సజావుగా జరిగేలా అన్ని శాఖలు సమన్వయంతో పనిచేయాలని ఎస్పీ డి.వి. శ్రీనివాసరావు ఐపీఎస్ స్పష్టం చేశారు.