కోదాడలో గంజాయి ముఠా గుట్టురట్టు.. 150 కిలోల గంజాయి పట్టివేత

 కోదాడలో గంజాయి ముఠా గుట్టురట్టు.. 150 కిలోల గంజాయి పట్టివేత

హోండా సిటీ కారులో తరలిస్తుండగా ఇద్దరు అరెస్ట్‌.. మరో ముగ్గురి కోసం పోలీసుల గాలింపు

కోదాడ, నవంబర్ 2: గంజాయి అక్రమ రవాణాకు పాల్పడుతున్న అంతర్రాష్ట్ర ముఠా గుట్టును సూర్యాపేట జిల్లా కోదాడ టౌన్ పోలీసులు రట్టు చేశారు. హోండా సిటీ కారులో భారీ మొత్తంలో గంజాయిని తరలిస్తుండగా పోలీసులు దాడి చేసి ఇద్దరు నిందితులను అరెస్టు చేశారు. వారి నుంచి సుమారు 150 కిలోల గంజాయిని స్వాధీనం చేసుకున్నారు. ఈ అక్రమ రవాణా వ్యవహారంలో మరో ముగ్గురు నిందితులు పరారీలో ఉండటంతో వారి కోసం ప్రత్యేక పోలీసు బృందాలు గాలింపు చర్యలు చేపట్టాయి.

ఈ కేసుకు సంబంధించిన వివరాలను ఆదివారం కోదాడ టౌన్ పోలీస్ స్టేషన్‌లో నిర్వహించిన విలేకరుల సమావేశంలో డీఎస్పీ శ్రీనివాస్‌రెడ్డి వెల్లడించారు.

ఆర్థిక ఇబ్బందులను ఆసరాగా చేసుకుని ముఠాలోకి..

పోలీసులు వెల్లడించిన వివరాల ప్రకారం.. కర్ణాటక రాష్ట్రానికి చెందిన ఈశ్వర్, శివప్ప, ఒడిశా రాష్ట్రానికి చెందిన రాజు కలిసి గంజాయిని అక్రమంగా కొనుగోలు చేసి వివిధ ప్రాంతాలకు తరలించి విక్రయించడం ద్వారా భారీగా డబ్బు సంపాదించాలని పథకం రచించారు. ఇందుకోసం ఆర్థిక ఇబ్బందుల్లో ఉన్న సెల్వ సూర్య, రాజగౌడన్ మురుగన్‌లను తమ అక్రమ వ్యాపారంలోకి దించారు.

గంజాయి రవాణా చేసే ప్రతి ట్రిప్పుకు ఒక్కొక్కరికి రూ.20 వేల చొప్పున, గంజాయి విక్రయించిన అనంతరం అదనంగా మరో రూ.30 వేల చొప్పున చెల్లిస్తామని ఆశ చూపారు. ఇందుకోసం హోండా సిటీ కారును ఏర్పాటు చేసి రాజమండ్రి నుంచి బెంగళూరుకు గంజాయిని తరలించే బాధ్యతను వారికి అప్పగించారు.

గతంలోనూ గంజాయి రవాణా చేసిన నిందితులు

నిందితుల విచారణలో కీలక విషయాలు వెలుగులోకి వచ్చాయి. సుమారు నెల రోజుల క్రితం కూడా సెల్వ సూర్య, రాజగౌడన్ మురుగన్‌లు రాజమండ్రి నుంచి బెంగళూరుకు 27 గంజాయి ప్యాకెట్లను తరలించినట్లు పోలీసులు గుర్తించారు. తిరిగి అదే తరహాలో గంజాయి రవాణాకు అంగీకరించిన వీరిద్దరూ అక్టోబర్ 29న కర్ణాటక నుంచి బయలుదేరి, అక్టోబర్ 30 రాత్రి రాజమండ్రికి చేరుకున్నారు.

అనంతరం అక్టోబర్ 31న ఒడిశాకు చెందిన రాజు తీసుకొచ్చిన 62 ప్యాకెట్లలోని సుమారు 150 కిలోల గంజాయిని కారులో లోడ్ చేసుకుని బెంగళూరుకు బయలుదేరారు. ఈ క్రమంలో పోలీసులకు అందిన సమాచారంతో అప్రమత్తమైన కోదాడ టౌన్ పోలీసులు వాహనాన్ని తనిఖీ చేసి గంజాయిని స్వాధీనం చేసుకున్నారు.

కారు, నగదు, సెల్‌ఫోన్లు సీజ్‌

పోలీసులు స్వాధీనం చేసుకున్న 150 కిలోల గంజాయితో పాటు అక్రమ రవాణాకు ఉపయోగించిన హోండా సిటీ కారును సీజ్ చేశారు. అలాగే రూ.15 వేల నగదు, రెండు మొబైల్ ఫోన్లను స్వాధీనం చేసుకున్నారు. ఈ కేసులో సెల్వ సూర్య, రాజగౌడన్ మురుగన్‌లను అరెస్టు చేసి న్యాయస్థానంలో హాజరుపరచనున్నట్లు డీఎస్పీ తెలిపారు.

మరో ముగ్గురి కోసం ప్రత్యేక బృందాలతో గాలింపు

ఈ అక్రమ గంజాయి రవాణా వెనుక ప్రధానంగా వ్యవహరించిన కర్ణాటకకు చెందిన ఈశ్వర్, శివప్ప, ఒడిశాకు చెందిన రాజు ప్రస్తుతం పరారీలో ఉన్నట్లు పోలీసులు వెల్లడించారు. వారి ఆచూకీ గుర్తించి అరెస్టు చేసేందుకు ప్రత్యేక పోలీసు బృందాలను ఏర్పాటు చేసినట్లు తెలిపారు. అంతర్రాష్ట్ర స్థాయిలో గంజాయి రవాణా చేస్తున్న ఈ ముఠా కార్యకలాపాలపై మరింత లోతుగా దర్యాప్తు కొనసాగిస్తున్నట్లు పేర్కొన్నారు.

మాదకద్రవ్యాల నిర్మూలనకు ప్రజలు సహకరించాలి

జిల్లా పోలీసు ఉన్నతాధికారుల ఆదేశాల మేరకు కోదాడ పట్టణ పోలీసులు గంజాయి, ఇతర మాదకద్రవ్యాల అక్రమ రవాణా, విక్రయాలు, వినియోగంపై నిరంతరం నిఘా కొనసాగిస్తున్నారని డీఎస్పీ శ్రీనివాస్‌రెడ్డి తెలిపారు. డ్రగ్ ఫ్రీ సొసైటీ నిర్మాణమే లక్ష్యంగా ప్రజల్లో అవగాహన కార్యక్రమాలు నిర్వహిస్తున్నట్లు చెప్పారు.

ఎక్కడైనా గంజాయి విక్రయాలు, వినియోగం లేదా అక్రమ రవాణా జరుగుతున్నట్లు సమాచారం తెలిస్తే వెంటనే సమీప పోలీస్ స్టేషన్‌కు తెలియజేయాలని ప్రజలకు విజ్ఞప్తి చేశారు. సమాచారం అందించిన వారి వివరాలను పూర్తిగా గోప్యంగా ఉంచుతామని భరోసా ఇచ్చారు.

ఈ విలేకరుల సమావేశంలో పట్టణ సీఐ శివశంకర్, ఎస్‌ఐలు అజయ్‌కుమార్, ఉపేందర్‌రెడ్డి, కానిస్టేబుళ్లు వెంకటేశ్వర్లు, నవీన్, లోకేష్ తదితరులు పాల్గొన్నారు.