పేకాట శిబిరంపై పోలీసుల దాడి.. 20 మందికి పైగా మహిళా వ్యాపారవేత్తలు పట్టుబాటు!

 

దీపావళి వేళ హైప్రొఫైల్ పేకాట శిబిరంపై పోలీసుల దాడి.. 20 మందికి పైగా మహిళా వ్యాపారవేత్తలు పట్టుబాటు!

హైదరాబాద్: దీపావళి పండుగ వేళ హైదరాబాద్‌లో హైప్రొఫైల్ పేకాట శిబిరం గుట్టురట్టయింది. బంజారాహిల్స్‌ పరిధిలో గుట్టుచప్పుడు కాకుండా నిర్వహిస్తున్న పోకర్‌ పార్టీపై టాస్క్‌ఫోర్స్‌ పోలీసులు ఆకస్మిక దాడులు నిర్వహించారు. ఈ ఘటనలో ప్రముఖ వ్యాపారవేత్తలు, వారి కుటుంబ సభ్యులతో కలిపి మొత్తం 30 మందిని పోలీసులు అదుపులోకి తీసుకున్నారు. వీరిలో 20 మందికి పైగా మహిళా వ్యాపారవేత్తలు ఉండటం నగరంలో తీవ్ర చర్చనీయాంశంగా మారింది.

'దీపావళి పోకర్ నైట్' పేరుతో జూదం

బంజారాహిల్స్‌ ప్రాంతంలో మహిళా వ్యాపారవేత్త గరిమ గనేరివాల్‌ ఆధ్వర్యంలో ఈ ప్రత్యేక పోకర్‌ నైట్‌ నిర్వహిస్తున్నట్లు సమాచారం. బయటి వ్యక్తులకు ప్రవేశం లేకుండా, అత్యంత రహస్యంగా ఈ కార్యక్రమాన్ని ఏర్పాటు చేసినట్లు తెలుస్తోంది. దీపావళి వేడుకల పేరుతో సంపన్నులు, ప్రముఖ వ్యాపార కుటుంబాలకు చెందిన వారిని ఆహ్వానించి పేకాట నిర్వహిస్తున్నట్లు పోలీసులకు సమాచారం అందింది.

దీంతో పక్కా సమాచారంతో రంగంలోకి దిగిన టాస్క్‌ఫోర్స్‌ పోలీసులు ఒక్కసారిగా దాడి చేసి పేకాట శిబిరాన్ని ఛేదించారు. ఈ సందర్భంగా అక్కడ ఉన్న 30 మందిని అదుపులోకి తీసుకుని విచారణ చేపట్టారు.

ఉస్మానియా ఆసుపత్రిలో వైద్య పరీక్షలు

పోలీసుల అదుపులోకి తీసుకున్న వారిని నిబంధనల ప్రకారం ఉస్మానియా ఆసుపత్రికి తరలించి వైద్య పరీక్షలు నిర్వహించారు. అనంతరం తదుపరి విచారణ నిమిత్తం పోలీస్‌స్టేషన్‌కు తీసుకెళ్లారు.

పండుగ వేడుకల ముసుగులో చట్టవిరుద్ధ కార్యకలాపాలకు పాల్పడితే ఎంతటి వారినైనా ఉపేక్షించేది లేదని పోలీసులు స్పష్టం చేసినట్లు సమాచారం. నగరంలో ఇలాంటి హైప్రొఫైల్‌ జూద శిబిరాలపై నిఘా మరింత పెంచినట్లు తెలుస్తోంది.

దీపావళి సంబరాల సమయంలో వెలుగుచూసిన ఈ ఘటన హైదరాబాద్‌ నగరంలో హాట్‌టాపిక్‌గా మారింది.