ప్రతి నియోజకవర్గానికి 3,500 ఇందిరమ్మ ఇండ్లు

తెలంగాణ ప్రభుత్వం అర్హులైన ప్రతి ఒక్కరికీ ఇందిరమ్మ ఇల్లు మంజూరు చేసే దిశగా కీలక నిర్ణయం తీసుకుంది. ఈ క్రమంలో తొలి విడతగా ప్రతి నియోజకవర్గానికి 3,500 ఇళ్లను మంజూరు చేయాలని నిర్ణయించింది. ఇప్పటికే దరఖాస్తు ప్రక్రియ పూర్తయింది, అర్హుల ఎంపిక కూడా పూర్తయింది.

ఇందిరమ్మ ఇళ్ల మంజూరు ప్రక్రియ వేగవంతం

ఇప్పటికే 72,045 మంది లబ్ధిదారులకు ఇళ్లను మంజూరు చేసిన అధికారులు, మిగిలిన గ్రామాల్లో అర్హుల ఎంపిక ప్రక్రియను కొనసాగిస్తున్నారు. ఇంటి స్థలం కలిగిన వారికి ప్రాధాన్యతనిస్తూ ఇళ్ల మంజూరును అమలు చేస్తున్నారు.

రెవెన్యూ, గృహ నిర్మాణ శాఖ మంత్రి పొంగులేటి శ్రీనివాస్ రెడ్డి ఇందిరమ్మ ఇళ్ల విషయంలో కీలక ప్రకటన చేశారు. మరో వారంలో ప్రతి నియోజకవర్గానికి 3,500 ఇళ్ల మంజూరు ప్రక్రియ ప్రారంభమవుతుందని తెలిపారు. అర్హుల ఎంపిక పూర్తయ్యాక వెంటనే పనులు ప్రారంభిస్తామని వెల్లడించారు.

అలాగే, జాబితాలో పేర్లు రానివారు ఆందోళన చెందాల్సిన అవసరం లేదని, ఇందిరమ్మ ఇళ్ల నిర్మాణం కొనసాగుతూనే ఉంటుందని చెప్పారు. మరో విడతలో మిగిలిన అర్హులను గుర్తించి, ఎంపిక చేస్తామని హామీ ఇచ్చారు.

రేషన్ కార్డుల జారీపై మంత్రి ప్రకటన

ఇందిరమ్మ ఇళ్లతో పాటు రేషన్ కార్డుల జారీ ప్రక్రియను కూడా మార్చి నెలాఖరులోగా పూర్తి చేయనున్నట్లు మంత్రి శ్రీనివాస్ రెడ్డి తెలిపారు. రాష్ట్రంలో ఇందిరమ్మ పాలన ప్రారంభమై 15 నెలలు పూర్తి కావస్తున్నాయని, ఎన్నికల్లో ఇచ్చిన హామీలను ఒకటిన్నింటిగా అమలు చేస్తూ ప్రజలకు మేలు చేస్తామని చెప్పారు.