మహిళలకు ఎడతెగని వంచన మాజీ మంత్రి హరీశ్ రావు

హైదరాబాద్: మహిళలను కోటీశ్వరులను చేస్తామనే వాగ్దానాలతో అధికారంలోకి వచ్చిన ముఖ్యమంత్రి రేవంత్ రెడ్డి, పాలనలో మాత్రం కోతలు కోసిన సీఎం అయ్యారని మాజీ మంత్రి, బీఆర్ఎస్ ఎమ్మెల్యే హరీశ్ రావు విమర్శించారు.

మహిళలకు ఎడతెగని వంచన

రేవంత్ రెడ్డి ప్రభుత్వం ఏడాదిన్నర పాలనలో మహిళలకు ఇచ్చింది ఒక్కటే—ఎడతెగని వంచన మాత్రమేనని హరీశ్ రావు మండిపడ్డారు. కాంగ్రెస్ పాలనలో మహిళలకు ఎలాంటి సంక్షేమ కార్యక్రమాలు అందుబాటులో లేవని, ఎన్నికల ముందు ఇచ్చిన హామీలన్నీ గాలికొదిలేశారని ఆరోపించారు.

ఆర్థిక భరోసా లేక మహిళలు అప్పులపాల

ప్రభుత్వం మహిళలకు వడ్డీ రహిత రుణాలు ఇస్తామన్న హామీ నెరవేర్చలేదని ఆరోపించారు.
ప్రస్తుతం రూ.5 వేల కోట్ల వడ్డీ రుణాల బకాయిలు ఉన్న ప్రభుత్వం, ఐదేళ్లలో రూ.లక్ష కోట్ల రుణాలు ఎలా ఇస్తుందో చెప్పాలని ప్రశ్నించారు.
మహిళలకు ప్రతి నెలా ₹2,500 అందిస్తామన్న హామీని అమలు చేయకుండా, వేడుకలు నిర్వహించడం సిగ్గుచేటన్నారు.

ప్రతీ మహిళకు రూ.37,500 ఎప్పుడిస్తారు?

ప్రభుత్వం ప్రకటించిన ప్రతీ మహిళకు ₹37,500 అందించే హామీ ఏమైందని నిలదీశారు. ఇంతవరకు ఆ మొత్తం ఎందుకు చెల్లించలేదో సమాధానం చెప్పాలన్నారు.

కేసీఆర్ హయాంలో మహిళలకు మంజూరైన పథకాలు నిలిపివేత

హరీశ్ రావు ప్రభుత్వంపై తీవ్ర విమర్శలు చేస్తూ, బీఆర్ఎస్ హయాంలో మహిళలకు అందించిన పథకాలను ఒక్కొక్కటిగా గుర్తు చేశారు:

కేసీఆర్ కిట్, న్యూట్రిషన్ కిట్— నిలిపివేశారు.
బతుకమ్మ చీరలు, ఆరోగ్యలక్ష్మి, ఆరోగ్య మహిళ పథకాలు— ఆగిపోయాయి.
పెన్షన్ల పెంపు— నిలిపివేయడం వల్ల వృద్ధ మహిళలు, విధవులు తీవ్రంగా నష్టపోయారు.

అధికారంలోకి వచ్చి హామీలన్నీ మరిచిపోయిన ప్రభుత్వం

హరీశ్ రావు అనేక హామీలను ప్రస్తావిస్తూ, అవన్నీ నెరవేరలేదని విమర్శించారు:

మహిళలకు రూ.20 వేల కోట్ల వడ్డీ లేని రుణాలు ఇవ్వాలని హామీ ఇచ్చి మర్చిపోయారు.
18 ఏండ్లు పైబడిన యువతులకు ఎలక్ట్రిక్ స్కూటీ హామీ నెరవేరలేదని చెప్పారు.
కళ్యాణలక్ష్మి పథకాన్ని రూ.1 లక్షతో పాటు తులం బంగారంతో పునరుద్ధరిస్తామన్న మాటకు నిలబెట్టుకోలేకపోయారు.
డ్వాక్రా సంఘాలకు భవనాల నిర్మాణం, బంగారు తల్లి పథకం పునరుద్ధరణ, అంగన్‌వాడీ టీచర్లకు రూ.18 వేల వేతనం— ఇవన్నీ అమలు చేయకుండా విస్మరించారని ఆరోపించారు.

నేరాలు పెరిగి, మహిళలు భద్రత కోల్పోయారు

కడుపుకోతలు మళ్లీ పెరిగాయని, నేరాలు పెరిగి మహిళలు భద్రత కోల్పోయారని హరీశ్ రావు ఆందోళన వ్యక్తం చేశారు. కాంగ్రెస్ ప్రభుత్వం మహిళలకు చేసిన అన్యాయాన్ని ఎవరూ క్షమించలేరని హెచ్చరించారు.

"నవ్విపోతే నాకేంటి సిగ్గు" - హరీశ్ రావు

హామీలన్నీ విస్మరించి, సంక్షేమ పథకాల్ని నిలిపివేసిన ప్రభుత్వం వేడుకలు నిర్వహిస్తోందని ఎద్దేవా చేశారు. "నవ్విపోతే నాకేంటి సిగ్గు" అన్నట్లు కాంగ్రెస్ ప్రభుత్వం ప్రవర్తిస్తోందని, ఇది ప్రజలకు బాధ కలిగించే అంశమని విమర్శించారు. మహిళలకు అన్యాయం చేసిన కాంగ్రెస్ ప్రభుత్వాన్ని ప్రజలు తగిన గుణపాఠం చెబుతారని హరీశ్ రావు అన్నారు.