కోఠిలో ఆశ కార్యకర్తల పెద్ద ఎత్తున ఆందోళన పలువురు అరెస్ట్

తమ సమస్యలు పరిష్కరించాలంటూ ఆరోగ్యశాఖ కమిషన్ ముట్టడి

హైదరాబాద్, తెలంగాణలో ఆశా వర్కర్లు తమ డిమాండ్ల సాధన కోసం ఈ రోజు కోఠిలోని ఆరోగ్య కమిషన్ కార్యాలయం వద్ద పెద్ద ఎత్తున ఆందోళన చేపట్టారు. తమ సమస్యలను పరిష్కరించాలని, న్యాయమైన వేతనాలు కల్పించాలని డిమాండ్ చేస్తూ, కార్యాలయాన్ని ముట్టడించారు.

ఉద్రిక్తతకు దారి తీసిన నిరసన

ఆందోళన కొనసాగుతున్న నేపథ్యంలో ఆశా వర్కర్లు ‘సీఎం డౌన్ డౌన్’ అంటూ నినాదాలు చేశారు. దాంతో, పరిస్థితి ఉద్రిక్తతకు దారి తీసింది. భారీగా పోలీసులు మోహరించడంతో, నిరసనకారులను అదుపులోకి తీసుకోవడం ప్రారంభించారు. కొంతమంది ఆశా కార్యకర్తలు గందరగోళంలో సొమ్మసిల్లిపడిపోయారు. పోలీసులు వారిని అదుపులోకి తీసుకుని అక్కడి నుంచి తరలించారు.

సీఐటీయూ ఖండన

ఆశా వర్కర్ల అరెస్టులను సీఐటీయూ తీవ్రంగా ఖండించింది. వారి సమస్యలను పరిష్కరించాల్సింది పోయి, అరెస్టులు చేయడం అన్యాయమని ఆరోపించింది. ఆశా వర్కర్లు ఆరోగ్య శాఖలో కీలక భూమిక వహిస్తున్నారని, వారికి సరైన వేతనం, సదుపాయాలు కల్పించాల్సిన బాధ్యత ప్రభుత్వానిదేనని పేర్కొంది.

ఆశా వర్కర్ల ప్రధాన డిమాండ్లు

1. వేతన పెంపు: ప్రస్తుతానికి తక్కువ వేతనం ఇస్తున్నందున, కనీసం ₹18,000 నెలవేతనం ఇవ్వాలని డిమాండ్.
2. కోవిడ్ సేవలకు గుర్తింపు: కోవిడ్ సమయంలో ప్రాణాలకు తెగించి పనిచేసినందుకు రూ.50 లక్షల బీమా సదుపాయం కల్పించాలని విజ్ఞప్తి.
3. ఆర్థిక సహాయం: మృతి చెందిన ఆశా వర్కర్ల కుటుంబాలకు రూ.50 వేల పరిహారం, విధుల్లో ఉండగా మరణించిన వారి కుటుంబాలకు మట్టి ఖర్చుల కోసం రూ.50 వేల ఆర్థిక సహాయం.
4. ఉద్యోగ భద్రత: ప్రభుత్వ ఉద్యోగుల తరహాలో ఈఎస్ఐ, పీఎఫ్, రిటైర్మెంట్ బెనిఫిట్స్, పెన్షన్ లాంటి సౌకర్యాలు కల్పించాలని డిమాండ్.

భవిష్యత్ కార్యాచరణ

ఆశా వర్కర్లు తమ డిమాండ్లు నెరవేర్చేంతవరకు పోరాటాన్ని కొనసాగిస్తామని స్పష్టం చేశారు. ప్రభుత్వం స్పందించకపోతే రాష్ట్రవ్యాప్తంగా పెద్ద ఎత్తున ఆందోళన చేపడతామని హెచ్చరించారు.