మాజీ మంత్రి విడదల రజని పై ఏసీబీ కేసు నమోదు

విజయవాడ, పల్నాడు జిల్లా యడ్లపాడులోని శ్రీ లక్ష్మీ బాలాజీ స్టోన్ క్రషర్ యజమాన్యాన్ని బెదిరించి రూ.2.20 కోట్లు అక్రమంగా వసూలు చేశారనే ఆరోపణలతో మాజీ మంత్రి, వైఎస్సార్సీపీ నేత విడదల రజని పై అవినీతి నిరోధక శాఖ (ఏసీబీ) కేసు నమోదు చేసింది. ఈ కేసులో ఆమెతో పాటు అప్పటి గుంటూరు ఆర్‌వీఈవో, ఐపీఎస్ అధికారి పల్లె జాషువా, విడదల రజినీ మరిది విడదల గోపి, ఆమె వ్యక్తిగత సహాయకుడు దొడ్డ రామకృష్ణలను నిందితులుగా చేర్చారు.

ఏసీబీ కేసులో ప్రధాన ఆరోపణలు:

ఏసీబీ అధికారులు లంచం తీసుకోవడం, బెదిరింపు, అనుచిత లబ్ధి కలిగించడం, నేరపూరిత కుట్ర వంటి అభియోగాలపై అవినీతి నిరోధక చట్టంలోని 7, 7ఏ సెక్షన్లు, అలాగే భారతీయ శిక్షాస్మృతి (IPC) 384, 120బీ సెక్షన్ల కింద కేసు నమోదు చేశారు.

విజిలెన్స్ నివేదిక ఆధారంగా చర్యలు

ఈ అక్రమ వసూళ్లపై తొలుత విజిలెన్స్ అండ్ ఎన్‌ఫోర్స్‌మెంట్ శాఖకు ఫిర్యాదు అందింది. ఈ విషయమై విభాగం డైరెక్టర్ జనరల్ హరీష్‌కుమార్ గుప్తా నిర్వహించిన విచారణలో కొన్ని ముఖ్యమైన ఆధారాలు బయటపడ్డాయి. అందుకు అనుగుణంగా ప్రభుత్వం ఏసీబీకి దర్యాప్తు బాధ్యతలు అప్పగించింది. ఏసీబీ డైరెక్టర్ జనరల్ అతుల్ సింగ్ ఆధ్వర్యంలో ప్రాథమిక దర్యాప్తు నిర్వహించగా, ఆరోపణలు నిజమని తేలడంతో శనివారం కేసు నమోదు చేశారు.

స్టోన్ క్రషర్ యజమానులను బెదిరింపులు

మాజీ మంత్రి విడదల రజని, ఆమె సహచరులు స్టోన్ క్రషర్ యజమానులు నల్లపనేని చలపతిరావు, నంబూరి శ్రీనివాసరావులను బెదిరించి డబ్బు వసూలు చేశారనే ఆరోపణలు ఉన్నాయి. వ్యాపారం నడిపించాలంటే అడిగినంత డబ్బు ఇవ్వాలని రజని హుకుం జారీ చేసినట్లు సమాచారం.

ఈ సందర్భంగా బాధితులు రజని కార్యాలయాన్ని సంప్రదించగా, లావాదేవీల కోసం ఆమె పీఏ రామకృష్ణను కలవాలని సూచించారట. రామకృష్ణ వారిని కలసి రూ.5 కోట్లు డిమాండ్ చేశారు.

విజిలెన్స్ అధికారి అక్రమ దాడి

ఈ డబ్బు ఇచ్చేందుకు ఆసక్తి చూపకపోవడంతో సెప్టెంబర్ 10న అప్పటి గుంటూరు రీజనల్ విజిలెన్స్ అండ్ ఎన్‌ఫోర్స్‌మెంట్ అధికారి, ఆర్‌వీఈవోగా ఉన్న ఐపీఎస్ అధికారి పల్లె జాషువా భారీ బృందంతో స్టోన్ క్రషర్‌పై దాడికి వెళ్లారు.

గమనార్హంగా, స్టోన్ క్రషర్ యాజమాన్యం నుంచి ఎలాంటి ఫిర్యాదు లేకపోయినా, విజిలెన్స్ డీజీ అనుమతి తీసుకోకుండానే జాషువా తనిఖీలు చేపట్టారని నివేదికలో పేర్కొన్నారు. ఈ దాడుల సమాచారాన్ని విజయవాడలోని విజిలెన్స్ ప్రధాన కార్యాలయానికి తెలియజేయలేదని ఏసీబీ గుర్తించింది.