తెలంగాణను వణికించిన భూకంపం – ప్రజల్లో భయాందోళనలు

తెలంగాణను వణికించిన భూకంపం భయంతో బయటకు పరుగెత్తిన ప్రజలు – రెక్టర్ స్కేలుపై 3.8 తీవ్రత

తెలంగాణలో సోమవారం సాయంత్రం స్వల్ప భూప్రకంపనలు సంభవించాయి. కరీంనగర్ జిల్లాలోని పలు ప్రాంతాల్లో భూమి ఒక్కసారిగా కంపించడంతో ప్రజలు తీవ్ర భయాందోళనలకు లోనయ్యారు. భారత భూకంప శాస్త్ర పరిశోధనా కేంద్రం (నేషనల్ సిస్మోలాజికల్ సెంటర్) ప్రకారం ఈ ప్రకంపనలు రెక్టర్ స్కేలుపై 3.8 తీవ్రతతో నమోదయ్యాయి.

చొప్పదండి, గంగాధర, రామడుగు మండలాల్లో కొన్ని సెకన్లపాటు భూమి కంపించిందని స్థానికులు తెలిపారు. అకస్మాత్తుగా భూమి వణకడంతో ఇళ్లలో ఉన్నవారు బయటకు పరుగులు తీశారు. గోడలు, కిటికీలు స్వల్పంగా కదలడంతో ఒక్కసారిగా భయం నెలకొంది. కొన్ని ఇళ్లలో సామాగ్రి కదిలినట్లు నివేదికలు అందాయి.

కరీంనగర్‌తో పాటు నిర్మల్ జిల్లాలోనూ ఈ ప్రకంపనలు నమోదైనట్లు తెలుస్తోంది. అక్కడ కూడా 5 నుంచి 7 సెకన్లపాటు భూమి స్వల్పంగా కంపించిందని సమాచారం. ప్రస్తుతం వరకూ ఎలాంటి ప్రాణనష్టం లేదా ఆస్తినష్టం జరగలేదని అధికారులు తెలిపారు. సమాచారం అందుకున్న వెంటనే రెవెన్యూ, విపత్తు నిర్వహణ శాఖలు స్పందించి పరిస్థితిని సమీక్షించాయి. సంబంధిత శాఖలు భూకంప తీవ్రతను అంచనా వేయడంలో నిమగ్నమయ్యాయి. నేషనల్ సిస్మోలాజికల్ సెంటర్ నుంచి అధికారిక నివేదిక అందేవరకు పరిస్థితిని జాగ్రత్తగా పర్యవేక్షిస్తున్నారు.

తెలంగాణ ప్రాంతం సాధారణంగా తక్కువ భూకంప ప్రభావానికి గురయ్యే జోన్ 2లోకి వస్తుందని శాస్త్రజ్ఞులు పేర్కొంటున్నారు. అయితే గోదావరి పరివాహక ప్రాంతాల్లో ఫాల్ట్‌లైన్లు ఉండటంతో అక్కడ అప్పుడప్పుడూ స్వల్ప భూప్రకంపనలు సంభవించే అవకాశం ఉంటుందని వారు చెప్పారు. ప్రజలు ఎలాంటి అపోహలకు గురికాకుండా, అధికారుల సూచనల మేరకు అప్రమత్తంగా ఉండాలని సూచించారు.