ఘోర రోడ్డు ప్రమాదం: లారీని ఢీకొట్టిన కారు ఎస్సై, కానిస్టేబుల్ మృతి

సూర్యపేట జిల్లా కోదాడ బైపాస్ వద్ద దుర్గాపురం సమీపంలో జరిగిన ఘోర రోడ్డు ప్రమాదంలో ఇద్దరు పోలీసు అధికారులు ప్రాణాలు కోల్పోయారు. విధి నిర్వహణ నిమిత్తం హైదరాబాద్‌కు వెళ్తున్న ఈ పోలీసుల వాహనం లారీని ఢీకొట్టడంతో ఈ దుర్ఘటన చోటుచేసుకుంది.

వివరాలు ఇలా ఉన్నాయి:

కోనసీమ జిల్లా ఆలమూరు పోలీస్ స్టేషన్‌కు చెందిన ఎస్సై అశోక్, కానిస్టేబుల్ బ్లెస్సిన్ ఒక కేసు విచారణలో భాగంగా హైదరాబాద్ వెళ్తుండగా ప్రమాదం జరిగింది. వారు ప్రయాణిస్తున్న కారు సూర్యపేట జిల్లా కోదాడ బైపాస్ రోడ్డులో దుర్గాపురం వద్దకు రాగానే, ఎదురుగా వెళ్తున్న లారీ ఒక్కసారిగా ఎడమవైపు మలుపు తీసింది. ఈ క్రమంలో వేగంగా వస్తున్న కారు అదుపుతప్పి లారీ వెనుక భాగాన్ని తీవ్రంగా ఢీకొట్టింది.

ప్రమాద వేగానికి కారు ముందు భాగం పూర్తిగా నుజ్జునుజ్జైంది. కారులో ఎయిర్‌బెలూన్లు పనిచేసినా, మృతికి అడ్డుకాలేకపోయాయి. ఈ ప్రమాదంలో ఎస్సై అశోక్, కానిస్టేబుల్ బ్లెస్సిన్ సంఘటనా స్థలంలోనే ప్రాణాలు కోల్పోయారు. కారులో ప్రయాణిస్తున్న మరో ఇద్దరు అధికారులు తీవ్రంగా గాయపడ్డారు. గాయపడిన వారిని సమీప ఆసుపత్రికి తరలించి చికిత్స అందిస్తున్నారు.

ప్రమాదానికి కారణం..?

ఘటనపై క్షతగాత్రులు మీడియాతో మాట్లాడుతూ, “మేము నిద్రలేమి కారణంగా కారును రోడ్డు పక్కన ఆపి గంటన్నర పాటు విశ్రాంతి తీసుకున్నాం. మళ్లీ బయలుదేరిన 15 నిమిషాల్లోనే ఈ ప్రమాదం జరిగింది,” అని తెలిపారు.

పోలీసుల స్పందన:

ప్రమాద సమాచారం అందుకున్న వెంటనే స్థానిక పోలీసులు సంఘటన స్థలానికి చేరుకొని సహాయక చర్యలు ప్రారంభించారు. మృతదేహాలను పోస్టుమార్టం నిమిత్తం ప్రభుత్వ ఆసుపత్రికి తరలించారు. అనంతరం కుటుంబ సభ్యులకు అప్పగించనున్నట్లు అధికారులు తెలిపారు. ఈ ఘటనపై కేసు నమోదు చేసుకున్న పోలీసులు లారీ డ్రైవర్ నిర్లక్ష్యం కోణంలో దర్యాప్తు ప్రారంభించారు.

ఈ ఘటనతో మృతుల కుటుంబాల్లో తీవ్ర విషాదం నెలకొంది. విధి నిర్వహణలో ఉన్న సమయంలో ప్రాణాలు కోల్పోవడంతో పోలీసు శాఖలో కూడా దిగ్భ్రాంతి వ్యక్తమవుతోంది.