తెలంగాణలో ఘోర రోడ్డు ప్రమాదాలు.. ముగ్గురు మృతి

తెలంగాణ రాష్ట్రంలో రెండు వేర్వేరు ప్రాంతాల్లో జరిగిన ఘోర రోడ్డు ప్రమాదాల్లో ముగ్గురు వ్యక్తులు ప్రాణాలు కోల్పోయారు. ఒకరు తీవ్రంగా గాయపడ్డారు. ఈ ఘటనలతో రెండు కుటుంబాల్లో విషాద ఛాయలు అలుముకున్నాయి.

సంగారెడ్డి జిల్లా:

సంగారెడ్డి జిల్లా కంది మండలం చేర్యాల గేటు వద్ద బుధవారం అర్ధరాత్రి భయానక రోడ్డు ప్రమాదం జరిగింది. లారీని ఢీకొన్న కారు ప్రమాదంలో ఫిల్మ్‌నగర్ ఎస్ఐ రాజేశ్వర్ గౌడ్ దుర్మరణం పాలయ్యారు. ఎల్లమ్మ ఆలయం బల్కంపేట వద్ద బందోబస్తు నిర్వహించి తిరిగి వస్తుండగా ఈ ప్రమాదం చోటుచేసుకుంది. తీవ్రంగా గాయపడిన ఎస్ఐ రాజేశ్వర్‌ను ఆస్పత్రికి తరలిస్తుండగా మార్గమధ్యలోనే మృతిచెందారు.

రాజేశ్వర్ గౌడ్ సంగారెడ్డిలోని చాణక్యపురి కాలనీలో నివాసం ఉండేవారు. ఆయన మరణవార్తతో కుటుంబసభ్యులు, సహచర ఉద్యోగులు షాక్‌కు గురయ్యారు. ఘటనా స్థలానికి చేరుకున్న పోలీసులు కేసు నమోదు చేసి దర్యాప్తు ప్రారంభించారు.

నిజామాబాద్ జిల్లా:

నిజామాబాద్ జిల్లాలోని పెద్దకొడప్‌గల్ మండలం జగన్నాథ్‌పల్లి శివారులో మరో ప్రమాదం చోటుచేసుకుంది. 161వ జాతీయ రహదారిపై ఆగివున్న కంటెయినర్‌ను ద్విచక్ర వాహనం ఢీకొట్టడంతో ఇద్దరు యువకులు అక్కడికక్కడే మృతిచెందారు.

మృతులు జుక్కల్ మండలం మహమ్మదాబాద్‌కు చెందిన పోనుగంటి వెంకట్ (21), మంగలి గణేష్ (19) గా పోలీసులు గుర్తించారు. ఈ ఘటనలో మరొకరు గాయపడగా, అతడిని చికిత్స నిమిత్తం బాన్సువాడ ఆస్పత్రికి తరలించారు. పోలీసులు ఈ కేసును కూడా నమోదు చేసుకుని విచారణ చేపట్టారు.

ఈ రెండు ప్రమాదాలతో సంబంధిత గ్రామాల్లో విషాదం నెలకొంది. నిర్లక్ష్యంగా వాహనాలు నడిపితే ఎలా ప్రాణాలు బలైపోతాయనే విషయంలో ప్రజలంతా మరింత అప్రమత్తంగా ఉండాల్సిన అవసరం ఉందని అధికారులు హెచ్చరిస్తున్నారు.