కొడుకు ప్రేమ పెళ్లి.. మధ్యవర్తుల ఒత్తిడితో తండ్రి ఆత్మహత్య

జోగులాంబ గద్వాల, ప్రేమ పెళ్లి చేసుకున్న కొడుకు పని ఒక కుటుంబాన్ని తీవ్ర విషాదంలోకి నెట్టింది. జోగులాంబ గద్వాల జిల్లా ఆలంపూర్ మండలం జల్లాపురం గ్రామానికి చెందిన జమ్మన్న (50) మధ్యవర్తుల వేధింపులు తాళలేక సూసైడ్ చేసుకున్న సంఘటన చోటు చేసుకుంది.

వివరాల్లోకి వెళితే, జమ్మన్న-హేమలమ్మ దంపతుల కుమారుడు నవీన్ (22) ఓ బంధువుల అమ్మాయితో ప్రేమలో పడ్డాడు. ఈ ప్రేమ విషయాన్ని తల్లిదండ్రులకు తెలియజేయగా వారు మళ్లీ ఆలోచించాలని సూచించారు. అయితే పెద్దల అంగీకారాన్ని లెక్కచేయకుండా నవీన్, తన ప్రేయసిని తీసుకొని రహస్యంగా పెళ్లి చేసుకున్నాడు.

ఈ విషయాన్ని తెలిసిన అమ్మాయి కుటుంబ సభ్యులు తీవ్ర అభ్యంతరం వ్యక్తం చేస్తూ పోలీసులకు ఫిర్యాదు చేశారు. దీనితో గ్రామస్థులు, బంధువులు, స్థానిక నాయకుల మధ్యచర్చల పేరిట జమ్మన్నపై తీవ్ర ఒత్తిడి తెచ్చారు. మానసికంగా ఎంతో పడి పోయిన జమ్మన్న, జూలై 29వ తేదీన సూసైడ్ చేసుకునే ప్రయత్నం చేశాడు. తీవ్రంగా గాయపడిన అతడిని ఆసుపత్రికి తరలించినా పరిస్థితి విషమించడంతో గురువారం చికిత్సలో మృతి చెందాడు.

ఈ ఘటనతో జల్లాపురంలో విషాద ఛాయలు అలముకున్నాయి. కొడుకు తీసుకున్న నిర్ణయం, గ్రామస్థుల తీరుతో ఓ తండ్రి ప్రాణాలు కోల్పోవాల్సిన పరిస్థితి తలెత్తడం స్థానికులను కలచివేస్తోంది. కుటుంబ సభ్యులు, గ్రామస్తులు జమ్మన్న మరణంపై విచారం వ్యక్తం చేశారు.

తల్లిదండ్రులకు గౌరవం – ప్రేమకు మార్గదర్శనం అవసరం

ఈ సంఘటన యువతకు, పెద్దలకూ ఒక గంభీర సందేశంగా మారుతోంది. ప్రేమపై ఉన్న నమ్మకాన్ని అంగీకరించడంలో సమాజం ఇంకా వెనుకబడుతుండగా, ఒత్తిడులు, సామాజిక ఆంక్షలు ఇలా అమూల్యమైన ప్రాణాలను బలితీస్తున్నాయి. ఇలాంటి ఘటనలు పునరావృతం కాకుండా అందరూ సంయమనంతో, న్యాయబద్ధంగా వ్యవహరించాల్సిన అవసరం ఎంతో ఉంది.