గుప్తనిధుల కోసం తవ్వకాలు.. టాస్క్ ఫోర్స్ వలలో ఏడుగురు!

వరంగల్ జిల్లా ముల్కనూరలో పోలీసులు రంగప్రవేశం పరికరాలు, కారు, మొబైళ్లు స్వాధీనం

వరంగల్ జిల్లా ముల్కనూరు గ్రామ శివారులో గుప్తనిధుల వేటలో నిమగ్నమైన ముఠాను టాస్క్ ఫోర్స్ పోలీసులు పట్టుకున్నారు. కష్టం లేకుండా కరెన్సీ కట్టలు సంపాదించాలని ఆశించిన స్వార్ధపరులు గుప్తనిధుల కోసం తవ్వకాలకు తెగబడ్డారు.

టాస్క్ ఫోర్స్ సమాచారం మేరకు పోలీసులు దాడి చేయగా, ఏడుగురు సభ్యుల ముఠా అక్కడే పట్టుబడింది. ఈ ముఠా ఖాళీ స్థలంలో భారీగా నిధులు దాగి ఉన్నాయని నమ్మి తాంత్రిక పూజలు చేసి రాత్రివేళ తవ్వకాలు చేపట్టింది. ఈ క్రమంలో కూష్మాండ బలి, క్షుద్ర పూజలు, డిటెక్టర్ల సహాయంతో తవ్వకాలు జరిపినట్లు పోలీసులు తెలిపారు.

దాడిలో పోలీసులు గుప్తనిధులను గుర్తించడానికి ఉపయోగించిన ప్రత్యేక డిటెక్టర్, తవ్వకాలకు వినియోగించిన పరికరాలు, ఒక కారు, ఒక ట్యాబ్, మరియు ఏడు మొబైల్ ఫోన్లు స్వాధీనం చేసుకున్నారు.

ప్రాథమిక విచారణలో, ఈ ముఠా గతంలో కూడా పలు ప్రాంతాల్లో ఇలాంటి తవ్వకాలు జరిపిందని పోలీసులు తెలిపారు. తవ్వకాల తర్వాత గుప్తనిధుల బూచి చూపించి అమాయకుల నుంచి డబ్బులు దోచుకున్నట్లు విచారణలో బయటపడింది.

అరెస్టయిన ఏడుగురినీ పోలీసులు రిమాండ్‌కు తరలించారు. గుప్తనిధుల మోహంలో మునిగిపోయిన ఈ ముఠా చర్యలపై మరింత దర్యాప్తు కొనసాగుతున్నట్లు పోలీసులు వెల్లడించారు.