హత్య కేసులో నిందితుడికి జీవిత ఖైదు విధించిన జిల్లా ప్రధాన న్యాయమూర్తి

భద్రాద్రి కొత్తగూడెం జిల్లా ప్రధాన న్యాయమూర్తి పాటిల్ వసంత్ మంగళవారం కీలక తీర్పు వెలువరించారు. కొత్తగూడెం 2 టౌన్ పోలీస్ స్టేషన్ పరిధిలో 2024లో చోటుచేసుకున్న భయానక హత్య కేసులో నిందితుడు లోద్ రమేష్ కు జీవిత ఖైదు శిక్ష విధించారు.

కేసు వివరాలు

కొత్తగూడెం రామవరం ప్రాంతానికి చెందిన కోరీ శ్రీకాంత్ ఫిర్యాదు మేరకు కేసు నమోదైంది. ఫిర్యాదు ప్రకారం తిలక్‌నగర్, రుద్రంపూర్‌లో నివసిస్తున్న లోద్ రమేష్, భార్య గొడవల కారణంగా వేరు కావడంతో, గత కొంతకాలంగా మద్యం వ్యసనానికి గురయ్యాడు. 2015లో కూడా తన తల్లిదండ్రులపై దాడి చేసిన ఘటనలో 2 టౌన్ పోలీసులు కేసు నమోదు చేయగా, ఆ కేసు తరువాత కోర్టులో రాజీ పడింది.

2024 మే 10న మళ్లీ ఘోర ఘటన చోటుచేసుకుంది.

చికెన్ వండిన తీరుపై కోరుతూ తల్లిదండ్రులతో రమేష్ గొడవపడి, ఉద్దేశపూర్వకంగా వారిపై దాడి చేశాడు. రాడ్డు, కత్తితో చేసిన దాడిలో:

తల్లి దూలారీ బాయి తలకు, చేతులకు, కాళ్లకు తీవ్ర గాయాలు
తండ్రి శ్యామ్లాల్ కు ప్రాణాపాయ గాయాలు
అడ్డుకోవడానికి వచ్చిన పిల్లలు గణేష్, గుణవతి కూడా తీవ్రంగా గాయపడ్డారు.

రక్తం కారుతున్న దృశ్యం చూసి రమేష్ అక్కడి నుండి పారిపోయాడు. గాయపడిన నలుగురినీ 108 అంబులెన్స్ ద్వారా ప్రభుత్వ ఆసుపత్రికి తరలించారు. మే 14న చికిత్స పొందుతూ దూలారీ బాయి మరణించడంతో కేసు హత్యగా మారింది.

పోలీసుల దర్యాప్తు

ప్రారంభ దర్యాప్తు: 2 టౌన్ సబ్ ఇన్స్పెక్టర్ ఇ. రాజేష్
ఛార్జ్‌షీట్ దాఖలు: అప్పటి ఇన్స్పెక్టర్ టి. రమేష్ కుమార్
ప్రస్తుత ఇన్స్పెక్టర్ డి. ప్రతాప్ కేసు విచారణను ముందుకు తీసుకెళ్లారు.

కోర్టు మొత్తం 15 మంది సాక్షులను విచారించింది.

తీర్పు వివరాలు

కోర్టు వాదోపవాదాలు విని లోద్ రమేష్ పై నేరారోపణలు ఋజువైన తరువాత ఈ శిక్షలు విధించింది:

IPC 302 – జీవిత ఖైదు + ₹1,000 జరిమానా
జరిమానా చెల్లించకపోతే 4 నెలల కారాగార శిక్ష
IPC 307 – 5 సంవత్సరాల జైలు శిక్ష + ₹500 జరిమానా
జరిమానా చెల్లించకపోతే 1 నెల సాధారణ జైలు
IPC 324 – 2 సంవత్సరాల జైలు శిక్ష + ₹500 జరిమానా. జరిమానా చెల్లించకపోతే 1 నెల సాధారణ జైలు