Panchayat Elections: సర్పంచ్‌, వార్డు సభ్యుల రిజర్వేషన్లు ఖరారు దశలో

హైదరాబాద్‌, నవంబర్‌ 22: తెలంగాణ గ్రామపంచాయతీ ఎన్నికల కార్యాచరణ వేగం అందుకుంది. సర్పంచ్‌, వార్డు సభ్యుల స్థానాలకు రిజర్వేషన్ల ఖరారుపై ప్రభుత్వం కీలకంగా కసరత్తు చేస్తోంది.

డెడికేటెడ్‌ కమిటీ అందించిన నివేదిక ఆధారంగా మండలాల వారీగా బీసీ రిజర్వేషన్లను 23% చొప్పున ఖరారు చేయడానికి ఇప్పటికే ప్రక్రియ ప్రారంభమైంది. కమిటీ సమర్పించిన నివేదికను ప్రభుత్వం మంత్రులకు పంపి ఆమోదం పొందగానే, దానిని అన్ని జిల్లాల కలెక్టర్లకు అందజేసింది. అనంతరం కలెక్టర్లు మండల స్థాయికి పంపి పరిశీలన పూర్తి చేశారు.

మండలాల స్థాయి పరిశీలన పూర్తయింది

కమిటీ సూచించిన రిజర్వేషన్ల ప్రకారమే మండలాల్లో సర్పంచ్‌, వార్డు సభ్యుల స్థానాల బీసీ రిజర్వేషన్లు పెద్దగా ఇబ్బంది లేకుండా ఖరారు చేసినట్లు నివేదికలు చెబుతున్నాయి. ఇప్పటికే అనధికారికంగా రూపొందించిన రిజర్వేషన్ల చార్ట్‌ సిద్ధంగా ఉండటంతో, ప్రభుత్వ మార్గదర్శకాలు వెలువడగానే వాటిని మరోసారి సమీక్షించనున్నారు.

ఈ వారం కీలక నిర్ణయాలు

• శనివారం: బీసీ రిజర్వేషన్ల ఖరారుకు మార్గదర్శకాలు విడుదల చేసే అవకాశం
• ఆదివారం: అన్ని జిల్లాల కలెక్టర్ల నుంచి తుది జాబితాల సమర్పణ
• 24వ తేదీ (సోమవారం): పంచాయతీ ఎన్నికలపై హైకోర్టు విచారణ – ప్రభుత్వం సిద్ధత నివేదిక సమర్పణ
• 25వ తేదీ: రాష్ట్ర మంత్రివర్గ సమావేశం
• 26వ తేదీ: పంచాయతీ ఎన్నికల షెడ్యూల్‌ వెలువడే అవకాశాలు

42% నుంచి 23%కు – బీసీ రిజర్వేషన్ల మార్పు

గతంలో రాష్ట్ర ప్రభుత్వం చేసిన బీసీ కులగణన ఆధారంగా డెడికేటెడ్‌ కమిషన్‌ 42% బీసీ రిజర్వేషన్లు సిఫారసు చేసింది. సెప్టెంబరులో అదే విధంగా క్షేత్రస్థాయిలో రిజర్వేషన్లు ఖరారు చేశారు. అయితే 42% అమలు రాజ్యాంగపరంగా సాధ్యం కానందున, ఇప్పుడు మళ్లీ పాత విధానంలో 23% బీసీ రిజర్వేషన్లు అమలు చేయడానికి ప్రభుత్వం ఉపక్రమించింది.

ఎస్సీ, ఎస్టీ రిజర్వేషన్లు మాత్రం 2011 జనాభా లెక్కల ఆధారంగా కొనసాగనున్నాయి. మొత్తం రిజర్వేషన్లు 50% మించకుండా చూడాలని ప్రభుత్వం స్పష్టం చేసింది.