జనవరి 1 నుంచి కొత్త రూల్స్ సాధారణ ప్రజలపై ప్రభావం చూపే కీలక మార్పులు!
హైదరాబాద్, డిసెంబర్ 30 : మరికొద్ది గంటల్లో పాత సంవత్సరం ముగిసి నూతన సంవత్సరం ప్రారంభం కానుంది. కొత్త ఏడాదికి స్వాగతం పలికేందుకు ప్రజలు సిద్ధమవుతున్నారు. కొందరు కుటుంబ సభ్యులు, స్నేహితులతో కలిసి పర్యటనలకు వెళ్లేందుకు ప్రణాళికలు వేసుకుంటుండగా, మరికొందరు ఇంటివద్దే న్యూ ఇయర్ వేడుకలు జరుపుకునేందుకు ఏర్పాట్లు చేస్తున్నారు.
ప్రతి కొత్త సంవత్సరం ప్రారంభమంటేనే ప్రజల్లో కొత్త ఆశలు, కొత్త లక్ష్యాలు, కొత్త ఉత్సాహం కనిపిస్తుంది. వ్యక్తిగత జీవితంతో పాటు ఆర్థికంగా కూడా ప్రజలపై ప్రభావం చూపే అనేక మార్పులు కొత్త ఏడాదితో అమల్లోకి వచ్చే అవకాశముంటుంది. బ్యాంకింగ్, ఉద్యోగాలు, డిజిటల్ భద్రత, నిత్యావసర ధరలు వంటి అంశాల్లో జరగబోయే మార్పులపై ఇప్పుడు ఓసారి దృష్టిపెడదాం.
క్రెడిట్ రిపోర్ట్లో కీలక మార్పులు
కొత్త ఏడాది నుంచి క్రెడిట్ రిపోర్టుల అప్డేట్ విధానంలో మార్పులు చోటుచేసుకోనున్నాయి. ఇప్పటివరకు బ్యాంకులు, ఆర్థిక సంస్థలు 15 రోజులకు ఒకసారి క్రెడిట్ సమాచారం అప్డేట్ చేస్తుండగా, ఇకపై వారం రోజులకు ఒకసారి తప్పనిసరిగా అప్డేట్ చేయాల్సి ఉంటుంది.
ఈ మార్పుతో సిబిల్ స్కోర్ మరింత పారదర్శకంగా మారుతుందని, రుణాల మంజూరులో ఆలస్యం తగ్గుతుందని ఆర్థిక నిపుణులు చెబుతున్నారు. అలాగే, నకిలీ లేదా మోసపూరిత రుణాలపై నియంత్రణ సాధ్యమవుతుందని భావిస్తున్నారు.
సోషల్ మీడియా యాప్లకు సిమ్ వెరిఫికేషన్ తప్పనిసరి
సైబర్ నేరాలు పెరుగుతున్న నేపథ్యంలో కేంద్ర ప్రభుత్వం కఠిన చర్యలకు సిద్ధమవుతోంది. ఇందులో భాగంగా సోషల్ మీడియా ప్లాట్ఫాంలకు కొత్త నిబంధనలు అమలు చేయనుంది.
కొత్త ఏడాది నుంచి సోషల్ మీడియా యాప్లు ఉపయోగించాలంటే సిమ్ బైండింగ్, వెరిఫికేషన్ తప్పనిసరి కానుంది. వాట్సాప్, టెలిగ్రామ్, స్నాప్చాట్ వంటి యాప్లకు ఈ నిబంధనలు వర్తించనున్నాయి. దీని ద్వారా నకిలీ ఖాతాలు, సైబర్ మోసాలకు అడ్డుకట్ట వేయాలని ప్రభుత్వం లక్ష్యంగా పెట్టుకుంది.
ప్రభుత్వ ఉద్యోగులకు శుభవార్త?
కేంద్ర, రాష్ట్ర ప్రభుత్వ ఉద్యోగులకు సంబంధించి వేతనాలు, డీఏ పెంపుపై కొత్త ఏడాదిలో కీలక నిర్ణయాలు వచ్చే అవకాశం ఉంది. డియర్నెస్ అలవెన్స్ (డీఏ) పెంపుపై సమీక్ష జరుగుతుండగా, కొన్ని రాష్ట్రాలు కనీస వేతనాల పెంపుకు కూడా సిద్ధమవుతున్నాయి.
వేతన సంఘాలకు సంబంధించిన అంశాలపై అధికారిక ప్రకటనలు వెలువడితే ఉద్యోగులకు ఆర్థికంగా ఊరట లభించే అవకాశముంది.
గ్యాస్ సిలిండర్ ధరల్లో మార్పులు
ప్రతి నెల మొదటి తేదీన వంట గ్యాస్, వాణిజ్య గ్యాస్ సిలిండర్ ధరలను ఆయిల్ కంపెనీలు సమీక్షిస్తుంటాయి. గత నెలలో వాణిజ్య గ్యాస్ సిలిండర్ ధరలు కొంత మేర తగ్గగా, జనవరి 1న కొత్త ధరలు ప్రకటించనున్నారు.
కొత్త ఏడాదిలో వంట గ్యాస్ ధరలు పెరుగుతాయా? తగ్గుతాయా? అన్నది వినియోగదారుల్లో ఆసక్తిగా మారింది.
మొత్తానికి, నూతన సంవత్సరం ప్రజల జీవితాలపై ఆర్థికంగా, డిజిటల్ భద్రత పరంగా కీలక ప్రభావం చూపే మార్పులతో ప్రారంభం కానుంది. ఈ మార్పులు సామాన్యుడికి ఎంతవరకు ఉపయోగపడతాయన్నది చూడాల్సి ఉంది.
Post a Comment