విహారయాత్ర నుంచి వస్తూ ఘోర రోడ్డు ప్రమాదం ముగ్గురు మృతి

ఖమ్మం: విహారయాత్ర ముగించుకుని తిరిగి వస్తున్న యువకులను మృత్యువు కబళించిన విషాద ఘటన ఖమ్మం జిల్లాలో చోటుచేసుకుంది. తల్లాడ మండలం అంజనాపురం గ్రామ సమీపంలోని శంకర్ దాబా వద్ద సోమవారం తెల్లవారుజామున జరిగిన ఘోర రోడ్డు ప్రమాదంలో ముగ్గురు యువకులు మృతి చెందగా, మరో ఇద్దరు తీవ్రంగా గాయపడ్డారు.

వేగంగా వచ్చిన కారు ఎదురుగా వస్తున్న లారీని ఢీకొట్టడంతో ఈ ప్రమాదం జరిగింది. ఢీకొట్టే సమయంలో కారు పూర్తిగా నుజ్జునుజ్జు అయింది. కారులో ముందు సీట్లో కూర్చున్న ఇద్దరు తీవ్రంగా ఇరుక్కుపోవడంతో వారిని బయటకు తీయడం చాలా కష్టసాధ్యంగా మారింది.

స్థానికుల సమాచారంతో ఘటనాస్థలికి చేరుకున్న పోలీసులు, జేసీబీ సహాయంతో అతి కష్టంపై మృతదేహాలను బయటకు తీసి పోస్టుమార్టం నిమిత్తం మార్చురీకి తరలించారు. గాయపడిన ఇద్దరిని 108 అంబులెన్స్ ద్వారా ఖమ్మం ప్రభుత్వ ఆసుపత్రికి తరలించి చికిత్స అందిస్తున్నారు.

యాత్ర వివరాలు:

పోలీసులు తెలిపిన వివరాల ప్రకారం…ఈ నెల 26వ తేదీన జనగాం జిల్లా నుంచి రెండు కార్లలో 10 మంది యువకులు ఆంధ్రప్రదేశ్ రాష్ట్రం ఒడిశాలోని పూరి జగన్నాథ స్వామి ఆలయానికి దర్శనానికి వెళ్లారు. అనంతరం విశాఖపట్నం జిల్లాలోని అరకు ప్రాంతంలో విహారయాత్ర ముగించుకుని తిరుగు ప్రయాణమయ్యారు.

అజయ్, కొల్లిపాక క్రాంతి, గట్టు రాకేష్, చిల్లర బాలకృష్ణ, రొయ్యల అనిల్—ఈ ఐదుగురు ఒకే కారులో సత్తుపల్లి మీదుగా ముందుగా ప్రయాణిస్తున్నారు. ఈ క్రమంలో అంజనాపురం సమీపానికి రాగానే ఎదురుగా వచ్చిన లారీని కారు ఢీకొట్టింది.

మృతుల వివరాలు:

ఈ ప్రమాదంలో

చిల్లర బాలకృష్ణ (30) – కారు డ్రైవర్
రొయ్యల అనిల్ (31)
గట్టు రాకేష్ (30)

ముగ్గురు అక్కడికక్కడే, అలాగే ఆసుపత్రిలో చికిత్స పొందుతూ మృతి చెందారు.

గాయపడినవారు:

మరో ఇద్దరు యువకులు తీవ్రంగా గాయపడగా, ఖమ్మం ప్రభుత్వ ఆసుపత్రిలో చికిత్స కొనసాగుతోంది.

మృతుల నేపథ్యం:

మృతులు జనగాం జిల్లా, స్టేషన్ ఘన్‌పూర్ మండలం, జాఫర్గాడ్ కు చెందినవారిగా పోలీసులు గుర్తించారు. చిన్నతనం నుంచి 10వ తరగతి వరకు ఒకే స్కూల్లో చదువుకున్న స్నేహితులు కావడం గమనార్హం. ప్రస్తుతం వారు వేర్వేరు ప్రాంతాల్లో ప్రైవేట్ ఉద్యోగాలు చేస్తున్నారు. మృతుల్లో ఒకరు డయాగ్నస్టిక్ ల్యాబ్‌లో, మరొకరు మెడికల్ రిఫ్రిజిరేటర్ టెక్నీషియన్‌గా పనిచేస్తున్నట్లు సమాచారం.

ప్రమాదానికి కారణం:

దట్టమైన పొగమంచు, అలాగే డ్రైవర్ నిద్రమత్తులో ఉండటం వల్లే ప్రమాదం జరిగి ఉండవచ్చని పోలీసులు ప్రాథమికంగా అనుమానిస్తున్నారు. ఈ ఘటనపై కేసు నమోదు చేసుకున్న రెండవ ఎస్‌ఐ వెంకటేష్ దర్యాప్తు చేపట్టారు.