ప్రియుడు పెళ్లికి నిరాకరణ.. బీటెక్ విద్యార్థిని ఆత్మహత్య

హైదరాబాద్, మీర్‌పేట్: ప్రియుడు పెళ్లికి నిరాకరించాడన్న మనస్తాపంతో బీటెక్ చదువుతున్న యువతి ఆత్మహత్యకు పాల్పడిన విషాద ఘటన హైదరాబాద్ మీర్‌పేట్ పోలీస్ స్టేషన్ పరిధిలో చోటుచేసుకుంది.

మీర్‌పేట్ ఎస్ఎస్ఆర్ నగర్లో నివాసముంటున్న అశోక్ కుమార్–రూప దంపతుల కుమార్తె విహారిక (20) బీటెక్ మూడో సంవత్సరం చదువుతోంది. ఇంటి సమీపంలో నివసించే కిషోర్ అనే యువకుడితో విహారిక కొంతకాలంగా ప్రేమ సంబంధం కొనసాగించినట్లు తెలుస్తోంది.

ఈ నేపథ్యంలో పెళ్లి చేసుకోవాలని విహారిక కోరగా, కిషోర్ అందుకు నిరాకరించినట్లు సమాచారం. దీంతో ఆమె తీవ్ర మానసిక ఒత్తిడికి గురైనట్లు కుటుంబ సభ్యులు తెలిపారు.

ఈ నెల 16న విహారిక ఎవరికీ చెప్పకుండా ఇంటి నుంచి వెళ్లిపోవడంతో కుటుంబ సభ్యులు మీర్‌పేట్ పోలీస్ స్టేషన్‌లో ఫిర్యాదు చేశారు. పోలీసులు మిస్సింగ్ కేసు నమోదు చేసి గాలింపు చేపట్టారు. అనంతరం 18వ తేదీన ఆమె ఇంటికి తిరిగి వచ్చింది.

అయితే ప్రేమించిన యువకుడు పెళ్లికి అంగీకరించకపోవడంతో తీవ్ర మనస్తాపానికి గురైన విహారిక, చివరకు ఆత్మహత్యకు పాల్పడినట్లు పోలీసులు తెలిపారు.

ఈ ఘటనపై కేసు నమోదు చేసుకున్న మీర్‌పేట్ పోలీసులు దర్యాప్తు కొనసాగిస్తున్నారు. యువతి మృతి కుటుంబ సభ్యులను తీవ్ర విషాదంలో ముంచింది.