తెలంగాణలో ఉప సర్పంచ్ల చెక్ పవర్ రద్దు వార్తలు ఫేక్..!
సోషల్ మీడియాలో వైరల్ అవుతున్న సర్క్యూలర్కు వాస్తవం లేదు: ప్రభుత్వ వర్గాలు స్పష్టం
తెలంగాణలో గ్రామ పంచాయతీల్లో ఉప సర్పంచ్లకు ఉన్న జాయింట్ చెక్ పవర్ను ప్రభుత్వం రద్దు చేసింది అంటూ సోషల్ మీడియాలో విస్తృతంగా ప్రచారం జరుగుతున్న వార్తల్లో ఎలాంటి వాస్తవం లేదని ప్రభుత్వ వర్గాలు స్పష్టం చేశాయి. ఈ అంశంపై వైరల్ అవుతున్న సర్క్యూలర్ పూర్తిగా ఫేక్ అని అధికారిక వర్గాలు కొట్టిపారేశాయి.
ఇటీవల రాష్ట్ర వ్యాప్తంగా గ్రామ పంచాయతీలకు నూతనంగా ఎన్నికైన సర్పంచులు, వార్డు సభ్యులు, ఉప సర్పంచులు పదవీ బాధ్యతలు స్వీకరించిన విషయం తెలిసిందే. అన్ని గ్రామ పంచాయతీల్లో అధికారులు ప్రమాణ స్వీకార కార్యక్రమాలు నిర్వహించి, పాలన బాధ్యతలను నూతన పాలకవర్గాలకు అప్పగించారు. దీంతో ఇన్నాళ్లు కొనసాగిన ప్రత్యేక అధికారుల పాలనకు తెరపడింది.
పంచాయతీరాజ్ చట్టం–2018 ప్రకారమే చెక్ పవర్
తెలంగాణ పంచాయతీరాజ్ చట్టం–2018 ప్రకారం గ్రామ పంచాయతీల్లో సర్పంచ్తో పాటు ఉప సర్పంచ్కు జాయింట్ చెక్ పవర్ కల్పించబడింది. ఈ నిబంధన ఇప్పటికీ యథాతథంగా కొనసాగుతోందని, దానిలో ఎలాంటి మార్పులు చేయలేదని అధికారులు స్పష్టం చేశారు. ఉప సర్పంచ్ పదవికి ఉన్న ప్రాధాన్యతను తగ్గించే విధంగా ప్రభుత్వం ఎలాంటి నిర్ణయం తీసుకోలేదని తెలిపారు.
వైరల్ సర్క్యూలర్ వెనుక కుట్ర?
సోషల్ మీడియాలో వైరల్ అవుతున్న సర్క్యూలర్కు సంబంధించి ప్రభుత్వ శాఖల నుంచి ఎలాంటి అధికారిక ఉత్తర్వులు జారీ కాలేదని స్పష్టం చేశారు. కొందరు కావాలనే గ్రామస్థాయిలో గందరగోళం సృష్టించేందుకు తప్పుడు సమాచారం ప్రచారం చేస్తున్నారని అనుమానం వ్యక్తమవుతోంది.
ప్రజలు, ప్రజాప్రతినిధులు అప్రమత్తంగా ఉండాలి
ఇలాంటి ఫేక్ న్యూస్ను నమ్మకుండా, అధికారిక సమాచారం కోసం సంబంధిత ప్రభుత్వ శాఖలు, జిల్లా అధికారులు లేదా గ్రామ పంచాయతీ కార్యాలయాల ద్వారా ధృవీకరించుకోవాలని సూచించారు. తప్పుడు వార్తలు ప్రచారం చేస్తే చట్టపరమైన చర్యలు తీసుకునే అవకాశం ఉందని కూడా హెచ్చరించారు.
Post a Comment