ప్రతి గ్రామానికి నాణ్యమైన విద్యుత్ – ప్రతి రైతుకు భరోసా డిప్యూటీ సీఎం భట్టి విక్రమార్క

ఖమ్మం జిల్లా, సత్తుపల్లి నియోజకవర్గం | డిసెంబర్ 23: గ్రామీణ ప్రాంతాల సమగ్ర అభివృద్ధి, రైతులకు నిరంతరంగా నాణ్యమైన విద్యుత్ సరఫరా అందించడమే లక్ష్యంగా తెలంగాణ ప్రభుత్వం కట్టుబడి ఉందని డిప్యూటీ సీఎం, ఆర్థిక శాఖ మంత్రి భట్టి విక్రమార్క స్పష్టం చేశారు.

ఖమ్మం జిల్లా సత్తుపల్లి నియోజకవర్గంలోని తల్లాడ మండలం పాత పినపాక గ్రామంలో పలు విద్యుత్ సబ్‌స్టేషన్ల నిర్మాణ పనులకు డిప్యూటీ సీఎం భట్టి విక్రమార్క శంకుస్థాపన చేశారు. ఈ సందర్భంగా ఆయన మాట్లాడుతూ, వ్యవసాయ రంగం అభివృద్ధి చెందాలంటే విద్యుత్ అత్యంత కీలకమని, రైతులు ఎదుర్కొంటున్న విద్యుత్ సమస్యలకు శాశ్వత పరిష్కారం చూపడమే ప్రభుత్వ ధ్యేయమని తెలిపారు.

రాష్ట్రంలో ప్రతి గ్రామానికి నాణ్యమైన విద్యుత్ అందించడంతో పాటు, సాగునీటి అవసరాలకు ఎలాంటి అంతరాయం లేకుండా విద్యుత్ సరఫరా చేయడంపై ప్రభుత్వం ప్రత్యేక దృష్టి సారించిందన్నారు. కొత్తగా ఏర్పాటు చేస్తున్న సబ్‌స్టేషన్ల ద్వారా లోడ్ సమస్యలు తగ్గి, గ్రామీణ ప్రాంతాల్లో విద్యుత్ సరఫరా మరింత మెరుగుపడుతుందని పేర్కొన్నారు.

శంకుస్థాపన కార్యక్రమం అనంతరం గ్రామంలో ఏర్పాటు చేసిన బహిరంగ సభలో డిప్యూటీ సీఎం పాల్గొన్నారు. ఈ సభలో స్థానిక ప్రజాప్రతినిధులు, అధికారులు, రైతులు పెద్ద సంఖ్యలో పాల్గొన్నారు. ప్రభుత్వం చేపడుతున్న అభివృద్ధి కార్యక్రమాలను సద్వినియోగం చేసుకుని గ్రామాలను అన్ని రంగాల్లో ముందుకు తీసుకెళ్లాలని భట్టి విక్రమార్క పిలుపునిచ్చారు.

ఈ కార్యక్రమంలో ఎమ్మెల్యేలు, ప్రజాప్రతినిధులు, విద్యుత్ శాఖ అధికారులు, కాంగ్రెస్ పార్టీ నాయకులు మరియు గ్రామస్తులు పాల్గొన్నారు.